去玩佐一圈剛剛返黎無幾日，睇到新聞，吉百利既朱古力廣告播至月尾將會停播，原因係有市民投訴「教壞細路」
真係荒天下之大謬。
邊個細路唔好奇，任何一個心智正常的孩童都會經歷過對自然萬物一切一切感覺神奇，欲一探究竟明白知其所以然的過程，做為家長如果一味靠「堵」，唔俾細路有一個正常既獲知渠道，任由細路私下自行探索，所引發既問題，絕對更多。
再退一步講，屋企細路學依支廣告去「擠眉弄眼」，有何不妥？有何不可？？？
莫非一個個細路，學似大人一般，語言成熟，表情木訥，是謂正常？
點解一眾大人與決策者，要用成人嘅眼界去抹殺細路應有嘅天真與樂趣，唔可以俾細路一個自由發展心智嘅機會？
而且，就廣告本身而言，我覺得真係好有創意，完全無任何既肢體語言，靠一段音樂，利用孩童面上誇張既表情去配合音樂的節奏，整體感覺非常之趣致，第一次睇到依支廣告既時候，就拍手掌讚賞。
咁樣出色的一段廣告，竟然被香港部份家長認為係「不知所謂」
真正不知所謂嘅，係依班完全欠缺幽默感，連少少想像力都欠奉既香港人。
背后睇到嘅，係香港嘅一個絕對悲哀。
一個完全封閉既生活模式，造就佐香港大多數人同樣封閉嘅思想方式，一個完全無想像力既都市，如何創造一個更加出色既未來？依家嘅香港，食緊嘅係前政府餘蔭下既老本，當一切資源耗盡之時，香港嘅將來，只會係死路一條。
-----------------------------------------------------------
生活當中可以令我哋開心嘅新聞越來越少，唯一可以自我控制到嘅，恐怕唯有滿足口腹之欲一事。
新買佐一個小玩意，可以喺屋企燒野食嘅一個電烤爐。
有三塊板，一塊易潔板，一塊鐵架，一塊石板。
可以互相配合使用。
底下總配有八隻細細隻嘅碟仔，可以順便融芝士或者乜乜都得。
爐頭前邊有一個製可以較大細火。
為方便清潔，我係個底部加佐一塊錫紙，咁用完之后唔使好辛苦去搞清潔，直接掉佐塊錫紙就得。
擺係廚房，油煙唔係好大，直接開抽油煙機已經足夠。
比燒炭爐，係絕對會少佐一層風味，但係屋企平日使用，真係超方便。
尋晚竟然話打到九號颱風，今日見天涼涼，咁就燒野食啦。
屋企凈有少少隔夜冷飯，加少少燒肉汁，少少辣醬，撈勻。
然后將撈好味既飯，整好造型。
我用係吉之島十蚊店買嘅飯團模型，用佐幾年羅。。。好抵。
然后燒烤爐開大火，等果石板熱，然后掃一層油，將飯團擺上石板，慢慢火烤熱。
另一邊順便擺埋一條粟米去燒。唔好嘥D火力嘛。。。。
係吉吉島買佐一盒切好片既五花腩，如果我自己切，真係好難切得咁靚。
五花腩烤之前二十分鐘，用烤肉汁去醃一醃佢。
用嘅係依隻燒肉汁，網上買，六蚊包，好細一包㗎，用一二次嘅量，剛剛好，唔怕用唔完擺到壞，而且個味幾香㗎。。。
燒完飯團，個石板已經好熱，即刻將五花腩擺上去。
用石板燒肉真係好好，因為個石板夠厚，keep住熱力好均勻，個五花腩一擺上去，成塊肉即刻離晒塊石板，因為即刻略略熟佐，咁就可以好輕易咁返個身，再燒另一邊。
除佐燒肉汁，我另外配多一隻醬汁去擦個肉，令佢更香。
強哥好鐘意玩燒野，所以我搞好所有材料，由得佢去燒啦，佢真係玩得幾開心㗎。。。。
個最后擦嘅醬汁，係用韓國既大醬，加少少老抽，少少糖，少少水去開佐一個醬汁。
大醬係用大豆去發酵製作，有好香既豆香味。韓國人鐘意用黎煮湯。
燒到最後，塊板因為D醬汁，燒到黑曬，不過好易洗得脫，真係超好用。。。。
加佐大醬，有濃濃既豆香味，加熱之后，配以豬肉嘅甘香。。。
D肉勁香。。。。
絕對正過我係出邊食過嘅韓燒。。。。。
而且係新新買嘅五花腩，香D甜D㗎，係出邊食肆，俾到你台面時，都唔知係幾耐之前整落㗎羅。。。
睇下，我配料，老公做燒，兩公婆合作，天下無敵既燒五花腩配燒飯團，出爐啦。。。。
Wa。。。。Yammy Yammy。。。。。
個飯團其實都幾大舊㗎，雖然幾塊仔，不過都食得夠夠。。。
加埋其它既五花腩，好好味。。。。
真係，叫我再去街食韓燒？自己整嘅好味好多好多好多。。。。
然後再黎一舊粟米，一個好完美既午餐。。。。。
係咁多。。。。
沒有留言:
張貼留言