豉油豬肚

前一日蒸佐一籠南瓜饅頭，蒸嘅時候唔記得轉細火，猛火蒸出嚟嘅饅頭，幾咁醜怪~~~

好唔開心之下，第二日再蒸過一次。

依次記得用中細火慢慢蒸，蒸出嚟幾咁靚~~~

拎佐一半大嘅俾經常同丞一齊玩嘅弟弟食，佢一家人都係素食者，所以依款饅頭，最適合~~~

早餐後，睇住丞嘅咀，問佢，係咪偷食佐醬~~

籍著飲水掩飾內心嘅不安「唔知咧~~~」

小朋友，下次記得偷食，要抹咀啊~~~~

表姨話夜晚收工後嚟探丞仔順便食晚飯。

果日落雨無去街，係樓下惠康可選擇嘅餸菜不多，表姨最愛我亞媽整嘅豉油豬肚，果日見個豬肚唔錯，咁就買佐盒豬肚返嚟，返轉個豬肚，最緊要係清洗入邊。

用鹽同生粉搓走表面嘅滑滑果層，清水洗乾淨之後，係鑊入邊輕輕煎一煎，一煎過，下圖圓圓所示嘅位置，會有一層白色嘅膜走出嚟，用手一捽，就可以捽走，最緊要係依個位置，要捽乾淨。

 清洗乾淨嘅 豬肚，再翻轉出嚟，擺入鑊度，落生抽老抽糖，再加水。

燜煮大約一個鐘至淋軟，因為燜嘅時間稍長，所以水要落多啲。

燜到淋之後，最後開大火收一收汁，就搞掂。

材料雖然簡單，但味道，試過食過嘅人，個個都念念不忘~~~~

好多時簡單嘅 幾款調味加埋食材本身嘅味道，已經可以組合成為一個好複雜而美妙嘅效果。

炒多個五色菜：白色嘅豆乾，紅色嘅甘筍，黑色嘅木耳，綠色嘅青椒，黃色嘅南瓜片。

一樣好好味~~~

輕多半邊雞，開飯~~~