前日個個得閒，奶奶叫齊人返屋企食飯，屋企買佐隻雪鴨，係百佳買，都係二十八蚊隻，抵到爛，見奶奶叫到返去食飯，趁人齊，我又整味鴨返去個個有份食。
上次去荃灣買嘢，無意中係街市見到有竹隔賣，都係二蚊塊，咁就買佐塊返嚟。好耐無見過依類嘢，或者係我無留意。
果日整鴨，就用得著佢啦。
做法：
1，隻鴨解佐凍之後，衝洗乾淨，剪佐成個羅友，因為個羅友有二粒嘢，勁臭，如果唔除佐果二粒嘢，煮起上嚟，成煲嘢都臭死，我又唔知果二粒嘢係邊二粒，索性成個羅友同佢煎佐去，果個位係軟骨，好易煎開㗎。
咁個鑊擺幾片薑係度，開熱個鑊，係咁干煎幾下個鴨皮，等佢出出油。
2，然後落水，落生抽老抽，落片糖，落白蘭地少少，開火燜啦，我燜佐都八個字咁耐㗎，隻鴨其實唔算大，1.3KG咋。
貪佢夠細隻，唔會太大份，太大嘅鴨皮，會有勁多油，依隻鴨仔細細，煮咁耐，都唔會有太多油走出嚟。。。。
3，燜到就嚟干水嘅時候，準備三粒咸檸檬，剁碎碎。
係自家醃嘅咸檸檬，比較細粒，所以我就落佐三粒。不過都係酸佐少少，下次落二粒就得。
4，抽起個竹隔，將咸檸檬倒入鴨度，開大火燜凈一碗仔汁，就熄得火，攤凍之後斬件可食。
咸檸檬嘅清香與酸咪咪，完全解除佐鴨嘅肥膩同果種「騷」味。
夏季食嚟，非常適合~~
帶佐返去，幾個叔仔都係第一次食，個個都豎起手指贊~~
成檯餸，最快清場嘅就係依味鴨肉，真俾面~~
其餘都係奶奶整嘅餸。
奶奶買佐二條膠魚自己打魚膠，讓苦瓜。
打佐個蠔油芡。。。
自己打嘅魚膠，夠曬爽口彈牙~~
依次奶奶整佐煎讓四寶。。。
讓完涼瓜，讓豆卜，讓青椒。。。
總有一大碟嘅讓茄子~~~
我至愛嘅讓茄子。。。。我專登擺係自己面前，哈哈哈。。。總包銷~
一大煲花膠冬菇燜鴨亦。
奶奶專登整佐好多，俾我帶佐一碗返嚟第二日食。
我稍稍覺得淡味佐D，所以第二日，又落佐薑蔥去爆香，再加少少蠔油略略燜一燜，好味好多。。。。
又係我至愛嘅豆豉梅子蒸倉魚，好滑好開胃，老爺總叻，嫌奶奶整得唔夠味，直接用魚肉去點我整嘅果味檸檬鴨嘅汁，話總好味。。。
例牌灼海蝦~
係太興斬佐半邊豉油雞。。。。
豉油雞，早知我整啦，叫奶奶唔使買~
太興斬佐一斤燒腩，因為凍佐，又用鑊爆返熱佢。
太興真離譜，唔知是否欺負老人家買嘢無咁仔細，收就收足120蚊一斤嘅腩肉嘅價錢，俾嘅卻係燒肉嘅部位，擺係面果幾舊就係腩仔，底下就全部係燒肉，鞋實實，就眼見到依碟嘢，120蚊啦。個個食佐一舊起，二舊止~~
太興D嘢又貴，一個餐都要四十幾蚊，又唔係話特別好味過人，做生意又唔老實，以后我都唔會再去幫襯佢地。
湯就煲佐土伏芩牛大力豬腱湯，好甘味~~
總有一個灼生菜未出場，依餐，真豐富~~
沒有留言:
張貼留言