美味自家餸---薑蔥牛柏葉、甜酸炸丸子

係街市凍肉舖買佐一大塊牛柏葉。

睇過新聞話，有D牛柏葉係用硫磺薰過變白，其實自己真係唔知點樣選擇先至謂之安全可信嘅牛柏葉，不過太耐無食過，經過凍肉舖見到一個師奶係度買，一大舊切開一半，佢要佐一半，咁我就跟手要埋另一半。

無問幾錢一斤，不過好大一舊，都係十三蚊咋~~~

唔知係未安全㗎，不過耐耐食一次，應該都唔會有咩大問題瓜。。。

去飲茶好鐘意叫一碟薑蔥牛柏葉，所以今日整嘅，就係依味簡單清爽嘅「薑蔥牛柏葉」啦！~

做法：1，先將牛柏葉切絲，然後飛一飛水，水滾之後掉牛柏葉落去，然后水再滾返，就可以撈起，過一過冰水，咁樣牛柏葉食落就會好爽口啦。。。同埋買嘅時候，靜靜雞偷偷捏一捏，好彈手無咁易爛嘅牛柏葉先好買啊~~

 

除佐牛柏葉，準備嘅材料當然就係最主要嘅「薑同蔥」啦，另外我再切多少少甘筍絲增加色彩，靚D~~

 

做法2，然後將薑絲同蔥段擺入一個碗仔度，燒滾幾匙梗油，趁熱倒入碗度，用油嘅溫度碌熟薑蔥，咁出嚟嘅油，就係香噴噴嘅「蔥油」啦。。

3，煮佐油嘅鑊繼續用返，落少少水，落豉油，落糖，雞粉，煮好一個甜豉油，然後將甜豉油倒入上個步驟嘅蔥油度，就變成一個香噴噴嘅香蔥豉油啦~~

 

最後，將準備好嘅香蔥豉油，同灼熟佐嘅牛柏葉撈勻，咁依款薑蔥牛柏葉，就整好啦~~

係咪好簡單咧`~~

同茶樓食果D味道係一樣㗎~~

而且唔使好似茶樓咁一路蒸住，都無晒口感，自己整，即整即食，爽口好多~~~

 

今晚另一味餸，係自家創意出嚟㗎。

平日整完豆漿會凈返好多豆渣，摸落手感好細膩，次次掉佐我都覺得好浪費，所以今日整完豆漿，D豆渣我就留返，睇下有無得再整返另一味食物出嚟。

咁就試下，除佐豆渣，再加「雞蛋一隻，麵粉三匙，蔥碎適量，煙肉剁碎碎，甘筍切粒粒，胡椒粉，鹽，麻油，砂糖，生油一細湯匙」

加煙肉係為佐令個丸仔更甘香，加雞蛋同面粉係為佐凝固得更好，其它配料係增加香味。

 

然後將所有材料撈勻，再搓成一粒粒丸仔。。。

 

跟住落油鑊，炸至金黃。。。

我食之前會回鍋翻炸一次，會香口好多~~

炸佐出嚟聞到果陣香味，已經忍唔住先食一粒。。。

其實就咁當小食嚟食，已經好好味~~

然後用「茄汁，白醋，砂糖，水」煮佐一個甜酸汁伴食。

好成功啊。。個丸仔口感係綿得嚟帶有少少彈性，加埋煙肉同胡椒粉麻油等調味，食落好似食腸仔咁嘅感覺。。。。

而且豆渣都算係粗糧，食佐對身體都有益㗎~~

茹素者，可剔去「煙肉」，咁依款，就係一款上好嘅素菜嚟㗎啦~~

 

咬一啖睇下，出邊好香脆，入邊就軟糯香口，配以甜酸汁，好好味~~

 

加埋一碗仔蘿蔔酸，一個美味嘅晚餐，搞掂~~