美味早餐自家制---香煎蔥油大餅、蒸蔥肉花卷

買多佐嘅肉碎一次用唔完，都會落面豉豉油將佢炒起，咁樣可以擺得多幾日都唔會壞，而且食面或者配菜亦都可以用得上。

 

炒香嘅肉醬變化多多，好似前日嘅早餐，就用佐肉醬嚟蒸面卷。

將發佐酵嘅面團搓成一片大薄片，然後肉醬與蔥同少少熟油同胡椒粉撈勻，再均勻地舖係成塊面皮上，然後滾滾滾成一條。

 

再用刀橫切成一舊舊。

然後擺住半個鐘，第二次發酵。

 

上鑊蒸十五分鐘即成~~

胡椒與香蔥嘅香味，配合鬆鬆棉棉嘅面皮，再配一杯咖啡~~

一個好美味嘅早餐就整好啦`~

 

-------------------------------------------------------------

隆重介紹今日早餐---香煎蔥油大餅

依個大餅都係我第一次整，而且係無食譜，自己就咁憑想像整出嚟㗎。

絕對適合所有唔識得整餅嘅同學，因為佢唔使繁複嘅搓揉發酵再搓再發酵嘅多個步驟。

先睇下材料：

干酵母一細細匙加和暖水開定佢、蔥幾條、中筋面粉三大湯匙、糖一大匙

 

做法：1，將蔥剁碎，然后落幾粒鹽，煲滾二湯匙油，趁熱倒入蔥碎度

 

2，將面粉同開佐嘅酵母搓好面團，唔使等發酵，直接搓成一塊，將上個步驟嘅蔥油用面團包好。

 

3，將面團同蔥油搓勻，其實後嚟我覺得，直接將蔥油倒入粉度直接搓好咪得羅，使鬼搓好再搓。

4，然後搵一個深碟，碟底落少少粉晾住，將搓好嘅蔥油面餅舖係碟度，擺係室溫發酵一個鐘。

5，再擺入雪櫃雪半個鐘或以上（我就擺入雪櫃雪佐一晚，今日早上先至煎香佢，所以依款早餐，可以提早一晚整好個面底，第二日再整嚟食）

點解要擺入雪櫃咧？因為雪過嘅發酵面餅，個口感鬆棉得嚟，會有一種好正嘅煙韌嘅口感，非常好味。

 

6，煎就好簡單，落少少油，潤濕薄薄一層個鑊底，然後開中火將面餅擺落去煎到兩邊表面金黃。

7，再熄細火，落細細半碗仔清水，蓋上蓋，等佢慢慢煎至收水，咁依款香煎蔥油餅，就整好了。。。。

 

都係早上趁新鮮煎嚟食最正，配杯咖啡，一流~~

 

個餅底係甜嘅，個蔥有少少少少咸味，外餅皮係煎到香香嘅，發得又好靚好成功，食起上嚟，好好味。。。

 

同街買嘅蔥油餅，係一樣㗎~~

聽日得閒，就整依款餅仔做晏啦~~

其實依個餅底嘅做法，可以唔落蔥，係面再落香腸芝士，入爐焗下，就係至靚嘅Pizza羅~~

總係厚批果隻添~~