去食川菜，必定要點嘅一款小食，就係四川涼粉。
無論係夏季定冬季，一碟香酸麻辣，軟滑透心涼嘅四川涼粉，都係我無法抗拒的美妙。
只要有材料，其實想係屋企自己整都絕非難事。
整四川涼粉最主要嘅材料係「豌豆粉」，我係香港搵極都搵唔到，後嚟有一個朋友知道我搵緊依樣嘢，就托人從四川幫我帶佐斤落嚟，真係萬份感謝依位朋友嘅心意！
不過依家有朋友話俾我聽，國內嘅淘寶網上都可以買得到豌豆粉，咁下次如果想整嚟食，就唔洗再麻煩人，自己上網訂就得啦。
好啦，言歸正傳，講返個做法先。
粉同水嘅比例，按朋友講法，應該係1：8。
不過我覺得依個同粉嘅質量有好大關係，朋友俾我依個豌豆粉，係自己屋企整嘅，比較純正啲，無摻雜任何雜物，咁凝固性就較強，如果係出邊買嘅豌豆粉，如果有添加其它嘢的話，我諗個比例可能要相應改小小，依個無得一概而論，只能係大概講下個做法，第時大家自己整嘅時候，要視乎情況自己調整。
做法：
1、準備一杯嘅豌豆粉。
2、用返同一個杯，裝一杯水，將粉開稀
豌豆粉同生粉嘅感覺好相似，唔知用粟粉加少少澄粉，可唔可以都做到涼粉咁嘅效果咧？得閒我要嘗試下，如果可以，咁就唔洗咁麻煩一定要搵到豌豆粉
（不過講返豌豆粉，佢有別於平時我啲食嘅生粉嘅係味道，佢有一股講唔出嘅清幽香味，我諗依個係用普通生粉絕對做唔到嘅味道，所以如果想食到最美味嘅麻辣涼粉，都係要尊重原始食譜，用返豌豆粉較適宜）
朋友講過，粉同水嘅比例係1：8
不過我試過我自己嘅容器，最多可以裝到6杯水，所以我自己改變佐比例，粉同水，用佐1：6嘅比例，最多会係硬凈啲。
咁開粉嘅時候用佐一杯水，所以，水凈返嘅用量，應該係五杯水。
3、搵一個煲，用返同一個杯，倒五杯水入去煮滾。
4、水滾後，將步驟2開好嘅粉漿，慢慢倒入滾水度，然後同時用一個敢麵杖，慢慢同一個方向攪拌。
（用敢麵杖去攪拌，係因為佢比較粗身同直身，咁攪拌嘅時候，就較好用力同埋唔會因為有一個曲折度而產生過多嘅氣泡，就咁一直同一方向攪拌，攪到自己感覺到好結，水變得好厚重嘅時候，就可以熄火）
5、搵一個容器，將上個步驟煮好嘅水倒入去，攤涼之後，擺入雪櫃雪凍佢。
二個小時之後，已經凝固得好好啦。。。。
只要將容器反扣，就可以好輕易地將涼粉倒出嚟啦。。。。
依個時候，涼粉就叫完成啦~~~
真係好靚，凝脂白玉般迷人~~~
鐘意點食都得啦。。。甜食又得咸食又得，切片又得切粒又得~~~
我就將佢切成條狀，配埋麻辣醬涼拌~~~
一杯豌豆粉咋，已經可以煮成咁大大一舊，我一次都只不過用佐三份一，已經可以做到大大一碟啦~~~
個麻辣醬汁，我用佐「生蒜蓉、黑醋、老干媽豆豉醬、麻辣醬、砂糖、麻油」撈成
然後舂碎少少花生碎加埋，有一個香脆嘅口感。。。。
（係廚房最好玩係隨手有乜就用乜，一成不變的結果只會更加增加煮食嘅負擔，我隨手要個厚底杯，就咁舂幾下花生，乾手凈腳，幾方便~~~）
再切埋少少青瓜絲，係要佢嘅清香~~~
全部材料撈埋，就係夏季食起上嚟最清新涼爽嘅「麻辣涼粉」啦。。。
一啲肉都無，油又少，愛嚟代替正餐，食得開心，食得飽肚，減肥，話咁易啦。。。。
F
回覆刪除