周日家聚之豐盛一餐

尋晚返奶奶度食飯，經過牛頭角果度睇到美亞開倉，即刻跳落車入去橫掃一番。

真係好抵買啊，好多貨品低於五折添㗎。

最近有需要買廚具嘅網友咪錯過啦。

可以座地鐵到牛頭角站落車，出站行官塘道對面馬路就可以見到大大美亞嘅大廈啦，係地下就係間舖頭做緊清倉啦。

買嘅時候要仔細自己睇清楚，因為係特價貨品，無得退換㗎。

為佐證實有幾抵買，睇下個全不銹鋼平底鑊，好鬼重㗎，鋼水都唔差㗎，盛惠$79咋~~~

係咪好抵玩咧~~~

 

強哥同四佬嘅生日好接近，所以尋晚提早幫強哥同四佬一起慶祝生日，（結佐婚嘅男人，生日多數都係同老婆仔撐檯腳，所以老爺奶奶好體貼地，提早幫倆兄弟同屋企人先做一次生日，正日再等倆公婆自己慢慢開心）

所以老爺奶奶準備佐好多好豐富嘅菜~~~

休漁期過佐，又有好多漁獲食啦~~~

餸1：奶奶自己手打嘅墨魚丸，加埋雜菜炒埋一碟，好清爽~~

餸2：好滑好香嘅白切雞

餸3：面線魚肚讓魚膠

面線魚嘅沙爆魚肚，食落鮮味實足，比普通魚肚，真係美味百倍~~~

餸4：蠔汁冬菇燜鴨掌

好惹味`~

 

餸5：老爺係漁排自己撈嘅墨魚仔，奶奶愛嚟用黑椒蒜蓉豉油糖爆香佢，惹味到極~~

餸6：煙肉蒸斑片

如果講味道，用煙肉包住斑片嘅味道，確係惹味佐好多，唯一缺點係煙肉會出好多油~~

不過煙肉嘅油脂滲佐入魚肉度，魚肉食落又滑又甘香，一件起兩件止，其實真係唔錯㗎~~

 

餸7：果皮蒸鮑魚

老爺一早係西貢帶落嚟嘅鮑魚仔，好抵食，每個都有返咁上下大，咁大一碟，都係一百蚊度。（老爺同西貢啲街坊都熟哂，所以買嘢當然會平靚正）

奶奶蒸得火候好掂啊，蒸之前總係生猛架鮑魚，蒸好後，食落係好爽好鮮甜，同埋有著好厚實嘅口感之餘，一啲都唔會韌，蒸鮑魚仔最講火候，如果蒸得唔夠時間未夠熟，肉就唔會脫殼，如果蒸得過火，肉又會變韌，就唗佐咁新鮮嘅鮑魚啦。

所以話奶奶蒸嘢功力夠深，蒸得恰到好處~~

（聽過有啲所謂食家話，鮑魚仔根本唔值得一食，話好似食橡膠咁，其實係佢未有機會食到真正烹製得一流嘅鮑魚仔先咁武斷姐，佢嘅孤陋寡聞，會令好多人錯失欣賞到一種美食嘅機會㗎）

餸8：開邊金銀蒜蒸龍蝦

奶奶依個超巨嘅大盤，每次都係用嚟蒸龍蝦嘅，啲龍蝦算係中等大細啦，食落都真係啖啖肉㗎。。。

咁蒸法，一啲都唔會老，龍蝦太大，肉會好鞋，中等大嘅龍蝦，味道又香，肉又爽，最一流啦~~

湯：花膠響螺湯

飲完啖湯，個嘴會膠住膠住㗎，好正~~

除佐二弟要陪女朋友屋企人，唔返得屋企

人齊開飯~~~