15蚊煮餐飯--有肉有老火湯

先睇下啖湯先。。。

黃豆豬手湯。

快速煲煲佐成個鐘，好融㗎啦。。。

 

餸係「甜酸辣豬手」

齋聽個名都知惹味咧。。。。

再睇埋張相，係咪總吸引咧~~~

 

睇下，果一餸一湯，最主要材料就係依盒「特價豬手」啦。

唔知係咪少人食豬手咧，次次去TASTE都可以撞到佢做特價啵。

一盒都幾大份㗎，有一隻開佐四邊嘅豬手仔，所以要叫阿姐再幫斬成粒粒，不過最唔好就係無得幫處理豬毛。

等我返屋企用個眉夾嚟清佐好耐先至清乾淨。我好有耐性㗎，清得好徹底。。。。

 

 

其實一份咁嘅豬手已經足夠。

灼熟之後清理乾淨啲毛，提早三個鐘浸發佐嘅黃豆，雪櫃有甘筍，就落埋一條，切幾塊薑。

煲個湯，就咁多材料咋。。。

所有材料掉落快速煲，由得佢煲，我就煲佐八個字左右。。。

 

睇下啖湯，好濃嘅骨膠原啊。。。。

皮膚靚靚，心情靚靚。。。

 

好啦，話明15蚊煮餐飯，別嘅材料就再無啦，所以要煮個餸，就要係煲完湯嘅湯渣落手啦。

我煲湯嘅時間唔算太長，八個字左右，所以個豬手都總可以見到嘢。。。

將豬手撈起，黃豆撈起一部份。

準備調味料「蒜頭切粒，干辣椒絲，豉油糖醋水」

 

 

做法：1，先用少少油爆香蒜頭，然後倒入辣椒絲略炒。

2，倒入豬手，倒入豉油糖醋水，加少少水燜。

 

3，燜至收汁之前，倒入一大扎嘅荽莤撈勻，轉入瓦煲仔。

 

食之前開火焗一焗佢，正到閉。。。。

加荽莤同唔加，個味係爭好遠㗎，加佐荽莤，可以好大程度咁中和佐豬手嘅肥膩感，倍添一種獨特嘅清香，甜酸之餘，食落完全唔會覺得流。

個豬手煲湯嘅過程已經變得好腍，加埋醬汁再燜一燜，又腍又入味，係一煲勁惹味嘅餸菜嚟嘅~~

 

晏畫無嘢做，我就先整定佐依兩煲啦，夜晚食飯之前只需要上火加返熱，等佢更入味之餘，食到尾，都係熱辣辣㗎~~~

 

唔計其它配料，主要材料，就係15蚊啦。。。。

一個老火湯，一個豬手煲，搞掂~~