豉油皇炒烏冬

今晚訂了台吃飯，中午這餐，隨便打發即可

豉油皇炒鳥冬

 

黃芽白、甘筍絲、午餐肉、蛋絲為輔料。

生抽老抽胡椒為調味。

配以一杯香濃㗎啡，一個簡單不失美味的周日午餐~~

 

 

這幾日的早餐多數在樓下餅屋購西餅，12元已有半打。

可自行下載打印或復印，全港聖安那可用。

 

 

兩餸一湯

近依一年，老公做嘢都做得好辛苦。

工程係多佐，但係利潤少佐，要求多佐，時間趕佐。

最近同某大公司合作，其實同依間公司合作已超過十年，以前一向合作愉快，基於對彼此嘅信任，從來工程進度都係如計劃完成，次次合作愉快。

可惜依家舊時嘅人事早已面目全非，合作過程處處危機，大機構嘅人事規則，係「明哲保身，少做少錯，不做不錯，如若有錯，定必他人之錯」

實在太了解個中因由。所以每次老公返嚟同我大吐苦水，我都唯有出口大斥對方之荒謬，幫老公一吐未能盡泄之憤，等老公個心舒服少少。

老公處事輸在太過仁厚，一遇錯著定必認定係自己未夠仔細之故，掛在嘴邊果句係「幫得咪幫囉」，但係依家人心不古，你退一步，人進三尺，搞到自己做起事情，如履薄冰，太過辛苦。

睇在眼內，心痛不已，又實在太了解外頭世界嘅血雨腥風是如何醜惡，自己如駝鳥一般，將心縮細至一間屋嘅大小，係自己嘅世界里邊，四季如春，鮮花綻放，歌舞昇平，需要做到嘅不過係二餐一宿儘量自己滿意，大家開心便已足夠~~

相對老公嘅辛苦，感覺自己實在不堪。

--------------------------------------------------------------

還能做些什麼呢？

煮得果一餐飯，實在無嘢好講。

蒜蓉炒黃牙白

加少少鹵水雞汁

青椒甘筍炒薑汁肉片

 

炒一個滑蛋俾老公，佢最鐘意食蛋。

 

煲一個老公至愛嘅青紅蘿蔔老火湯。

 

如此而已~~

 

 

 

大人細佬都鐘意---薑汁香煎肉片

強哥尋晚多嘢做，無返嚟食飯，晚飯自己一個人搞掂。

本嚟想碌個面算數，不過屋企有一舊豬扒，已經擺佐一日，想處理佐佢，唔好擺咁耐。

細個時唔鐘意食菜，凈係鐘意食肉，如果無乜餸，我就會扁起個嘴唔肯食飯，細個時太瘦，阿媽一直想盡辦法想我食多哋飯，咁遇著我唔肯食飯嘅時候，阿媽就會煎一碟細細仔嘅薑汁肉片俾我，多啲啲嘅肉汁愛嚟撈飯，咁阿媽就唔駛理我，我自己會搞掂一碗飯㗎啦。

尋晚自己一個人嘅晚餐，又整返依一味薑汁肉片俾自己。

做法：

先將薑磨成蓉，量嘅多寡隨肉片而定。

然后落「生抽、老抽、黑糖、酒、生粉」

撈勻成醃汁。

 

係街市買佐舊豬扒肉，本嚟係想煎香茅豬扒，不過老公唔返嚟食飯，咁就全部切薄片。

 

將切好嘅豬扒醃二十分鐘左右。

 

因為我得閒，就一塊塊擺入鑊煎一煎定形，因為肉片好薄，基本上兩邊煎成金黃色就已經熟佐。

煎好一塊擺入碟，再落一塊生嘅落去繼續煎~~

 

煎好肉片嘅鑊好多肉汁，唔好嘥佐佢，洗佐幾片椰菜，掉入去炒幾下，落少少幼鹽調味，搞掂~~~

 

肉片自己食一半，留返另一半第二日再加青椒落去炒埋，又可以一碟餸啦。

 

 

蒸埋一細碟仔飯，有肉有菜，一個人嘅晚餐都可以好豐富。。。

我鐘意香口啲，就咁香煎，如果鐘意有肉汁撈下飯，可以落少少水去煮個肉片，我覺得依款肉片好適合帶飯，煮多少少肉汁，第二日翻叮都依然好好味㗎~~~

北方小食---韭菜盒子、韭菜餃（圖解）

尋晚無食飯，食餃子。

韭菜豬肉餃

我鐘意用自己整嘅酸汁，熱鑊落油爆香蔥頭同蒜頭，落水落生抽老抽落雞粉，落白醋落糖調味，最後埋個芡，熄火後落大量荽莤，搞掂。

食時配以大量炒香嘅花生碎~~

自己整嘅味道，有出邊絕對食唔到嘅美妙滋味~~~

所以想食餃子，絕不假手他人~~

 

睇下，包佐成三十幾隻餃子，我食少少就夠，凈返果啲留返第二日煎返佢，脆卜卜，一樣美味~~~

咦，右上角果四隻大餃子係~~？

 

煎餃？大煎餃？？

哈，都算係，不過有一個更正式嘅名，叫「韭菜盒子」

係北方一種極常見嘅小食，而且就算係新手，都一樣可以整得到嘅簡單面食。

我尋日都係第一次整㗎，但係食落個口感，同街食果啲係一樣嘅~~

 

拌完餃子餡發現凈有少少韭菜，唔想嘥佐佢，就諗起依款面食，知道做法好耐，一直無去整過。

我自己嘅做法講下：

韭菜餡：

韭菜剁碎、雞蛋炒散、豬肉少少炒香、五香粉同花椒粉少少先用滾油淋出香味、少少糖，少少鹽，撈埋，就搞掂個韭菜餡

 

面皮

因為個餡唔係好多，所以凈係用佐一杯嘅中筋面粉

 

落少少煲滾嘅水，睇下，用滾水碌過嘅面粉，即熟，變成透明色。

同平日開粉用凍水嘅效果係明顯唔同嘅，依種方法叫「燙面法」

燙面整出嚟嘅面皮通常都較有水份，較軟身，比較適用於煎或者蒸嘅面食用。

將落佐滾水嘅面粉撈勻，等溫度稍降之後，就將佢搓成面團，如果太乾，可加少少凍水繼續「和面」

 

搓好嘅面團，放置室溫當中「醒面」十分鐘。

 

醒好嘅面團，跟住好似整包包咁，將佢分成幾個細嘅面團仔，再用面杖壓成一塊塊圓薄塊（我係整成一大塊之後用個大碗壓成一塊塊同樣大細嘅圓面皮）

擺上餡料

 

然後直接咁樣翻過嚟，其實就咁直接壓實個邊口位就好啦

 

我鐘意搞搞震，整埋個花邊~~~

 

然後熱鑊落油，將兩邊慢火煎至變成金黃色即成~~~

提醒一下，個餡唔好包得太多，要留有少少空間俾佢，因為煎嘅過程會有空氣進入，會脹大，如果餡太多就會爆開個口啦。

不過我捏成花邊仔都幾好㗎，唔會爆開個口嘛~~

 

（贊下我個生鐵鑊，落油少，容易煎得香脆之餘，一啲都唔痴底，好好使更好洗）

 

個餡好香啊。。。。

個面皮亦都同出邊街食嘅一樣，外層脆卜卜，內里總好軟熟，食落唔會又乾又硬，好成功~~~

 

依排皮膚有少少痕，整佐一大碗嘅龜苓膏食下~~~

排下毒素先~~~

 

 

 

 

美味鹽燒龍利魚潑（食譜）

在一個經常去睇嘅BLOG度睇到網友經常會用到一種叫「魚潑」嘅食材，睇落個樣好似好滑好好味咁，不過自己就一直都搵唔到。

直至前日去佳寶買菇菇時，突然發現有包裝好一包包嘅雪得實一實嘅魚潑，個名叫「龍利魚喉」~~

售價極之廉價，我買佐依包十幾隻嘅，都只不過係七蚊雞一包。

即刻買佐包返嚟試下。擺係雪櫃下層一日慢慢解凍。

尋日就拎出嚟煮了。

我自己就覺得，就咁睇外形，勁似一對「天使的翅膀」

解佐雪嘅佢啲，有好大一陳「爛佈」咁嘅味道，勁怪。。。。。

心大心細，整唔整好咧。。。。

不過如果唔整就咁掉佐佢，好浪費喎。。。。

本嚟係諗住用薑蔥豉油蒸佢，不過睇到個底有好多黃色嘅肥膏狀物體，我驚太肥，而且個味似乎怪怪哋，咁臨時，我就轉佐另一種處理方式。

 

做法：1，解佐凍嘅魚潑衝洗乾淨之後，落一大湯匙嘅日本味鹽（即係背景後邊果隻，如果無，就咁用鹽同胡椒粉，黑椒粉撈埋都得），撈勻味道，醃佢五個鐘左右。

除佐味鹽，其它乜材料都唔駛落。

2，然後焗爐預熱220度火之後，用220火，焗佐二十五分鐘左右。

 

時間上視焗爐嘅火力去自己控制，因為我個爐仔好細瓦數，焗得係慢啲，如果係大焗爐，火勁啲，咁就要縮短焗嘅時間。

依個就要自己判斷了。

無焗爐嘅話，就咁用鑊煎都OK㗎，不過無需落太多油，因為個魚潑會自己走好多油出嚟。

 

睇下，焗好之後，個亦脆卜卜㗎，可以就咁咬落去食，好香口添~~

未焗之前擔心嘅爛佈味，焗好之後完全無佐，變得好香好香。。。

因為我凈係焗一面，所以個面係脆卜卜，但係個底就保持好多汁好滑，加埋味鹽嘅香味唔算太濃，唔會搶去太多風頭，總好好咁帶得出魚嘅味道。

我從焗爐攞出嚟嘅時候，老公係度問我「咦，咩嚟㗎，咁似金魚仔嘅」

「金魚~·！#！%，唔係，係天使的翅膀」

趁熱脆卜卜即刻攞一隻嚟食「嘩，老婆，好香好滑喎，你落佐咩料咁特別嘅個味，好好味啊」

「嘩，老婆，個亦食得㗎，好脆啊，好正」

 

凈返一個細隻脆肉瓜，加埋一條甘筍，炒埋佢。

料頭方面我用佐一條臘腸切粒粒增加甘香味，另外切佐蒜頭同乾蔥粒。

 

依排乾蔥好平，係街市買佐一包返嚟，加到餸入邊，香好多㗎，一包都不過係2.5蚊。

咦，突然諗到「乾蔥焗雞」依味餸添~~~

 

炒埋都叫有碟菜食下~~

 

加埋打邊爐凈返嘅一舊仔蘿蔔，滾佐一個蘿蔔瘦肉湯，搞掂~~

 

結束之前，再睇下個「鹽燒魚潑」

我就覺得似一對亦啦。。。。。

識得自己出好多油嘅亦添~~~

老公話，依碟嘢如果係日本餐廳食，唔話你知，可以扮下貴嘢添~~~

切，成本都不過係七蚊雞咋~~~

 

 

食菇之---蒜蓉牛油焗香菇、蘑菇廋肉湯

依排都係掛住打機，尋日一起身，由朝早九點一直打機打到接近下午四點，連早餐同午餐都懶得去食，先至匆忙走去街市求其買D餸。

自己都覺得有少少過份，玩物喪志啊。。。。

走去街市，無無聊聊，唔知買乜餸好，去到佳寶門口，見到有新鮮菇菇喎，買佐八蚊雞菇菇返嚟，本嚟係想孜然燒菇菇嘅。

不過諗諗下用焗爐似乎耐佐D，咁就轉用中式鑊嚟整一味餸啦。

準備材料有：

新鮮香菇幾兩一開四（好大一朵），李X記蒜蓉一大湯匙，牛油一細舊，炒香芝麻少少（我屋企凈有就落埋，無都無問題）

 

做法：1，先將牛油落鑊，開最細火，然後倒入香菇兜勻，唔好落水，蓋好個鑊，就咁用細火慢慢焗熟，新鮮香菇本身都有一定嘅水份，所以唔使驚會痴底或者燒干。

2，用鑊焗有個好處，可以自己控制火，我凈係焗佐五分鐘左右，就搞掂啦。焗熟個菇菇，最後先至落一大湯匙蒜蓉，日本味鹽較味。熄火之後倒入芝麻撈勻，搞掂~~~

整碟菇菇，都係幾分鐘咋~~~

快過焗爐咧~~而且好香口~~~

好滑嘅菇菇，好香嘅味道~~~

拍得住係日本餐廳食果啲~~~

 

而且，因為係用鑊就咁干燒，唔落水，所以睇下個菇菇，邊邊係有少少焦黃色，加埋牛油同蒜蓉味，係好好味㗎~~

街市一百蚊隻嘅生鐵鑊，幾好用啊。。。。

完全唔痴底㗎~~

 

買佐份脆肉瓜，五蚊有三條，用佐較細嘅兩條，加埋瘦肉同木耳，少少蒜蓉同蔥頭，炒埋一碟~~~

 

唔知點解，我係好鐘意食脆肉瓜喎，而且係要切條狀好似好味啲咁喎`~~

 

係佳寶買佐盒秀珍菇，都係四蚊雞咋，加埋少少碎肉，少少蔥，滾個清湯。

作法：凍水落薑，水滾掉菇入去，稍滾幾分鐘，然後倒入較好味嘅肉，煮一煮熟，較個生粉水落去，等啖湯滑啲，熄火後掉一扎蔥段落去，搞掂~~

 

好清甜㗎啖湯~~~~

啲菇又滑又好味~~

 

香菇八蚊，秀珍菇四蚊，脆肉瓜兩條當三蚊，瘦肉攪佐十蚊用一半當五蚊，依餐飯，唔計調味料，盛惠二十蚊~~~

就有兩餸一湯啦，而且最緊要，快啊嘛~~~

食完繼續爆機。。。。。

正~~

 

 

 

街市雜貨舖買生鐵鑊一個試用

睇返舊年九月份換返第二隻「天X野」嘅生鐵鑊，用到依家，都叫忍佐一年有多，算罷了。

可以睇返舊年圖片記錄。搵笨第二次

 

2007年買佐第一隻勁搵笨嘅「天X野」生鐵鑊，2008年已經用到爛，於是加多120蚊又去佢公司換多個，諗住第一個可能係自己唔識用引致，點知第二個，用佐三個月之後，個底嘅模樣。。。

諗諗下，算啦，個底壞，個鑊面無問題都繼續用啦。

 

但係到佐上個星期，個面亦都開始。。。。

爛鬼佐~~

你話如果係一個一百幾十蚊嘅鑊，咁樣嘅質素，我都可以忍啦，但係成七舊幾水嘅一個鑊，有絕對被人搵笨嘅感覺。

 

尋日激鬼氣，唔再買貴一貴嘅鑊啦，走去旺角街市嘅雜貨舖，買佐一隻百幾蚊嘅生鐵鑊。

下圖，左邊係七舊水嘅爛鑊，右邊係新買嘅生鐵鑊。

36CM大，生鐵制，可上電磁爐，唔要個蓋（要返天X野嘅蓋，一樣36CM）老細回返四十蚊俾我。

自己開鑊，買佐二蚊扎蒜苗，分兩次，用煮餸嘅油，落多啲，係咁省。。。

乾乾淨淨~~

 

省乾淨啦，原價158蚊，唔要個蓋，回返四十蚊，再俾個折頭我，Total都係110蚊。

勁抵玩~~

就算一年換一個，我都心甘命抵~~~

而且無涂層，用得安全，某蘇介紹嘅「黑金鋼」，我覺得表面都係有塗層，所以不建議購買使用。

用返最傳統嘅生鐵鑊，唔靚，但勝在夠健康，炒餸夠鑊氣~~~

個手工係無果個「天乜鬼野」咁幼滑，但係最緊要用得開心，抵玩嘛。。。。