住家菜---靈芝人參雞湯、檸檬鴨、蒜蓉紅莧菜

細個時阿媽成日逼飲靈芝湯，可惜小朋友有幾個識得欣賞果種苦盡甘來既至高享受。。。。

不過靈芝對容顏怕是真係多少有D作用，因為多年黎阿媽一直KEEP住會用靈芝或者參衝滾水飲，咁多年落黎，阿媽真係無乜老人斑，以七十幾歲既人黎講，白頭發亦都無乜幾條，睇落似六十左右既人多D，真係唔知同佢既生活習慣有無關係咧。。。

靈芝阿媽都會選用野生較細枝果D，而我就直接同藥房買大大隻果D，叫店員代為切片，無乜講究。

相較之下，我既生活實在粗糙得多。

依日被阿媽「我」得多，煲一煲靈芝湯黎飲啦。

其實到依家幾十歲人羅，都係無乜點食得苦，少少苦味已經叫苦不迭。。。

材料：靈芝三至四片，花旗參三條，薑一舊，桂圓肉幾粒，蜜棗二粒，紅棗杞子適量。

加埋一個雞殼。。。。

睇下，D靈芝煲好之后，一睇就會覺得係好「藥材」既感覺，未試我已經可想而知有幾咁難飲啦。。。。

不過，聞落個味真係好鬼香。。。。

 

個個都會以為靈芝咁苦實係好涼既藥性黎，其實靈芝個藥性係好溫和架，任何人食用都無乜問題，而參無以為就一定係燥熱架，當中花旗參，係寒架，最適合我屋企D熱底既人用，所以煲依煲湯，我會落D薑同桂圓去中和返成煲湯，咁樣煲出黎唔燥唔寒，其實有乜野特殊作用，真係天曉得啦。。。

不過，真係好苦啊。。。。。

--------------------------------------------------------------------

我整既檸檬鴨，絕對唔係大排檔食到果D用黃檸整出黎既芡汁就叫做檸檬鴨。

我用既係咸檸。。。

咸檸既味較之普通檸檬味道更為濃郁，同較為濃味既鴨肉搭配，只會互相輝映，絕不牴觸。

食起上黎，另有獨特風味。

材料：

鴨亦一盒，蒜幾粒，薑一舊拍碎。

作法：

1，蒜同薑落鑊爆香，倒入鴨亦炒干身

2，加生、老抽，糖調味。

3，加水燜。

4，將咸檸檬剁碎，鴨肉收汁之前倒落去兜勻鴨身即可。

（因為咸檸皮久煮會苦，所以一定唔可以太早落，不過佢既味好濃好重，就算最后落，一樣可以好完美既融合入鴨肉內，帶有少少既咸酸味，獨有的清香，完全瓦解鴨肉本身既騷味，同鴨肉產生完美效應）

 

如果未試過，絕對有必要嘗試整一次。。。。

至此對鴨肉會有全新睇法。。。。

不過強哥唔多識得食無乜肉既亦，下次買半邊啖啖肉既鴨肉返黎照版再泡制一次~~~

再炒多一個莧菜，搞掂。。。

 

全家福。。。。