電陶爐烘饅頭之功效

熱天整包最易，早幾日整蒸餸，搞好料之後無乜事做，諗住蒸完餸，順手蒸埋幾個包做早餐，點知剛搓好個麵團，強哥就返到屋企，咁就由得佢自己發陣酵，我哋就開飯啦。

一餐飯半個鐘，食飽飯一睇，個麵團已經發得勁大份。

基本上我依家整包都係「搓麵、造型整包、發酵、蒸熟」咁嘅步驟，不過依晚做包，依舊傳統做法「搓麵、發酵麵團、造型整包、再發酵、蒸熟」

其實無論邊種方法去整包，只要發酵成功，最終出嚟嘅結果都差不多~

依晚整嘅係花生包。

餡料係炒香嘅花生舂碎，加埋椰絲、紅糖、白砂糖撈勻而成。

咁樣配搭嘅餡料香噴噴~~

題外話：依排唔知係咪大廈水喉唔乾淨，啲水唔乾淨，搞到我兩隻手掌生佐勁多水泡泡，一粒粒細細粒水泡仔，少少痕癢，搞到個手又乾又痕，好煩，又唔知擦咩藥膏好，我就由得佢自己生到飽啦，依家已經開始收水脫皮，無佐水泡，但到依家都唔知其實係咩事嚟嘅。

轉返正題，搓好的包包，因為已經發過一次酵，所以再發酵，都係十分鐘左右。

水滾後放上去蒸八分鐘。

個個肥肥白白又鬆軟彈手，幾好手感啊~~

每次睇到啲蒸好的包包發得靚靚，心情就會變得同樣靚靚㗎啦~~

整包做麵團嘅過程我以前寫得好多，有興趣可以自己搵返，不過我從來無詳細去量度過份量，因為我自己次次落嘅份量都唔同嘅，所以如果你問我要詳細的份量，我真係答唔到出嚟，我真心認為多啲少啲材料，其實都無所謂，一樣整到咁嘅效果出嚟，真係無需太計較水幾多酵母幾多麵粉幾多嘅問題，大致上唔好太誇張地離譜就得啦。

無論整包或煮餸甚或係做人，切記要放鬆，俾多啲信心自己，試多幾次，一次唔得咪二次三次四次直到得為止，無問題㗎，不過我始終覺得，做錯嘢係唔緊要嘅，最怕係做錯佐又唔識得去搵原因從而去改善令到問題下次唔會再發生嘅，咁就索性承認「失敗」，咪再搞啦~~

所以我幾時都覺得，一個「睇得到問題」嘅人，比起一個「識得講答案」嘅人，更加有前途~~~

一個人提出的問題比起答出的答案更能睇穿一個人的深淺。

整好的包包，第二日蒸返熱佢，切開嚟睇下~~~

發得太勁啦。。。包皮咁鬼厚~~

下次包皮要搓得薄身啲，咁就算發起佐，都唔會咁厚啦~~

好彩個餡又香又甜，包皮厚啲，反而食起上嚟無咁膩~~

 

所以話，「包皮過長就需要去割，包皮過厚，於口感，係無任何影響的！」

有網友問我用邊款麵粉，剛好買佐兩包，影抵佢俾網友參考下。

超市好似唔見有依款麵粉賣，我係街市雜貨舖買嘅，好似我咁樣整一籠包，一次大概用三分一再多啲啲嘅份量，一包麵粉可以玩三次㗎，六蚊包，抵玩~~

最簡單的莫過於整饅頭啦~~

依次就係按返我嘅慣例，搓好的麵團先整好形再擺住發酵，最後蒸熟。

一樣一個個發到豬頭咁大隻~~~

新鮮蒸好的饅頭軟綿綿熱辣辣，趁熱切兩片落嚟擦花生次同練奶食~~

嘩，有別於泡打粉制成的無邊無際無感覺地鬆軟程度，酵母製造的氣洞令到饅頭鬆軟之餘不失彈性充滿存在感，麵粉加埋酵母獨有的清香，絕對一啖一個喜悅~~

又或者好似我咁，先燒一燒到饅頭表面金黃香脆再食。

除佐增加了佐口感的酥脆程度，其實咁樣烘過的饅頭，有絕對的食療效果。

現代人多少都會有啲腸胃方面的問題，避無可避㗎啦，爭在未發生更大問題之前你自己知唔知自己嘅問題姐，連精神緊張都會導致胃潰瘍，你話，身體的傷痛，係咪避無可避？

加上香港人食食埋埋咁多肥膩嘢，運動又做得少，你話身體器官的負荷係咪真係超佐標咧，得閒去做下身體檢查，睇下心肝脾肺腎有無問題，越早發現越早治療對自己就越好㗎，好簡單㗎，做個超聲波，乜都睇得清清楚楚，有無腎石膽石脂肪肝，不過到佐咁下上年紀（三十歲以後，身體機能開始下滑），通常多少都會有啲問題㗎啦，我尋日因為胃唔舒服，去佐照勻全身的內臟，連胃鏡都做埋，最後發現有少少胃炎，好彩，問題好細，其它器官暫時都好健康，好彩同時發現腎有少少石仔，囑我多做運動多飲水，佢都會自己排出嚟嘅，不過都要密切關注依個問題，所以提提各位，身體好緊要，小小病痛都唔好由得佢，最好去睇下醫生確診下，病向淺中醫啊~~

又再離題目十萬八千里，講返烘過的饅頭。

江湖傳聞，烘過的饅頭，對於治療胃潰瘍有奇效，若果係寒性潰瘍病，無需食藥，持續食一年的烤饅頭，胃潰瘍可不藥而癒。

原來饅頭中的澱粉質經過熱力加熱會發生化學變化，經過熱力澱粉會變為糊精，糊精能夠促進口水分泌，同口水進入胃部可以幫助增加胃動力從而改善胃的消化能力，總可以中和胃酸過多，咁樣慢慢調理返個胃嘅功能，胃病就自然會好返啦。

中醫成日都話胃病係要「三分靠藥七分養」，要徹底地解決胃部問題，就要養好個胃，胃病先唔會復發，希望大家都健健康康無病無痛啦~~~

烤饅頭的過程中我離開佐一下下，個饅頭燒到有少少過火，太黑又唔好㗎，最好係燒到淡淡黃色，咁就最好啦。

我就用屋企嘅電陶爐燒嘅，用佐咁耐，越嚟越鐘意佢，可以使用的範圍好廣範，誠意向各位推薦，因為好多網友問我購買嘅網址，係度直接發上嚟，有意購買嘅朋友可以上去個網站了解下。

愛上廚電陶爐專賣    < --------（請點擊左邊的果幾個字即可進入網址）