紅燒讓苦瓜、炒青豆

今日朝早五點幾起身去廁所，經過書房突然感覺到一室的陽光感覺，未完全張開眼，矇查查之間望過去，原來太陽已經蠢蠢欲動要衝破雲層出嚟同我打招呼~~

我好少依個鐘數起身，所以完全唔知依家太陽原來咁早晨就起佐身，無帶眼鏡，隨手影佐張相，咦，又幾清喎，天都總未光得哂~~~

今朝早餐，中式的饅頭，配以德國香腸，香腸同饅頭一起蒸熟之後，係鑊仔度用燒烤汁燒一燒香個表面，食時配以沙律醬，美味~~

再煮碗麥皮，衝壺山楂茶，用十分鐘整個豐富的早餐出嚟，話咁易~~

尋晚整讓苦瓜。強哥慣佐奶奶通常都係用魚膠去讓苦瓜，我反而比較鐘意用豬肉去讓嘅味道，豬肉就簡單地用「少許米酒、糖、鹽、生粉」醃好，讓入苦瓜中間，擺上鑊，落埋「幾片薑同幾粒蒜頭」，略略煎一煎香表面。

煎至兩邊金黃即可。

然後準備兩款調味「蠔油同蒜蓉豆豉醬」

鑊內直接加水，落少少糖，落蠔油同蒜蓉豆豉醬調味。

開火煮七八分鐘至熟，唔揭蓋，焗多十分鐘之後，再開返火煮熱佢，俾少少生粉水入去收汁，搞掂。

我之所以要先煮熟一次再焗住佢，再開火煮多次嘅作用，係可以令到苦瓜變得好似隔夜再煮嘅效果咁，又黃又淋，我自己覺得咁樣好味好多~~

無嘢好講，鐘意苦瓜嘅人，一定鐘意依味餸~~

炒多碟豆角，搞掂~~