一字排開~~~
第一碟係煎蛋，跟住係涼拌青瓜，然後係麻辣牛肉，最後係湯面。
細細一碟小菜，大大一碗面，舒服~~~
今年天氣真係古怪，乍暖還寒，搞佢唔掂~~~
雖然依幾日都依然係寒寒哋，不過臨近五月，個心已經自動撥向夏季，所以味覺都不期然地偏向清爽與簡單的食物。
依日唔想食飯，就整佐幾個小菜，煮碗面，兩公婆撐台腳~~~
整一個涼拌青瓜。
各家各施其法，都有自成一味嘅做法。
因為整另一味係比較辣嘅小菜，所以青瓜就刻意整得清爽啲。
我鐘意用「蒜蓉、黑醋、雞粉、糖、麻油、自制花椒油」搞成個醬汁。
淡淡嘅花椒味，微微嘅酸意，食落口係爽爽嘅感覺，青瓜獨有嘅清香，一啖咬落，連心都似乎泛起一絲嘅清涼之意~~~
買佐幾斤嘅牛肉，鹵好一大大碗。擺住係雪櫃，煮面或者配菜炒都係一流嘅選擇。
因為要擺幾日，好多人以為雪櫃可以抑制細菌嘅滋長，其實雪櫃只不過可以減緩細菌滋長嘅速度，佢係無辦法完全抑制細菌嘅生長㗎。
所以鹵好嘅牛肉，我會再用油炸一炸再擺入雪櫃，咁樣可以擺得耐少少。。。。。
今次用嘅係新鮮牛展嚟整，牛味雖然無巴西嘅金錢展咁濃，但係勝在口感更為嫩滑，切開嚟睇，都一樣有筋㗎。。。。
牛肉，又係涼拌。
我整佐四川嘅麻辣味。
可惜無買到芫莤，如果加埋芫莤，總香啊。
個醬汁我用嘅材料「麻辣醬一湯匙、麻油少少、黑醋少少、蒜蓉一湯匙、白砂糖一大湯匙」
糖嘅量一定要夠，要食得出甜味，咁先至可以減少麻辣嘅強烈。
講起糖，講個題外話，我多數會用粗粒嘅糖，而且唔鐘意用「太X」果個牌子，因為果個牌子嘅糖，可能過於著重外觀嘅重要性，所以雖然白一白，靚一靚，但係糖嘅甜度，反而就大大減低佐，我依家多數係「惠X」買廣西出嘅一個「象X」牌嘅粗粒白糖，糖嘅甜度高好多，以前用太X牌，起碼要兩匙嘅份量先至達到心目中嘅甜度，依家轉佐象X嘅白糖，只需要一匙，已經可以做到同樣嘅效果，足證太X嘅甜度，真係好低。
做法好簡單，將較好嘅醬汁，同鹵好味嘅牛肉撈勻，就搞掂啦。。。
一餐只用佐兩舊細細舊嘅牛肉，切好已經有一碟`~~
麻麻香香，一點唔誇張，比係香港好多間食肆食過嘅麻辣牛肉總要好味。。。。
面，我其實唔多鐘意食公仔面，炸過嘅面，硬係覺得無佐面粉嘅香味。
反而依排鐘意食依款生面，幼幼一條，煮一煮就搞掂。。。。
份量係細啲，我食就剛剛好，如果男人食，起碼兩包。
煮好嘅面仔，配以舅母自己炸嘅油蔥酥，一流中嘅一流啊。。。
舅母整佐好大一樽俾我啊。。。。
捧住一大碗面，稀哩嘩啦地一啖面一啖小菜，享受，就係咁簡單~~~~
沒有留言:
張貼留言