香菇甘筍鮮肉大包

早排成日整包都得閒擺上嚟，依幾日連續POST整大包啦。

依款包包係隨意之中整出嚟，味道我覺得好好嘅一款大包。。。。

包包嘅皮已經不在討論範圍，因為以前做法已講過好多，所以主要係想講個餡嘅調配。

如果對於包包嘅皮未有了解嘅，可以參考我依個做法「請點擊此處」

依日，整甘筍大包。


長期備有甘筍，所以整包包，臨時無材料配搭嘅時候，少少豬肉加埋雜七雜八，就可以做出一個餡。

甘筍若手工切會稍粗，做為包包嘅餡嚟講，於口感上唔係太美，所以我就用個擦，三分一截甘筍，全部刨成絲。

刨好嘅甘筍，俾幾粒鹽入去，撈勻停一陣，自己就會走好多甘筍汁出嚟。

咁樣甘筍入邊無太多水份，蒸好嘅包包都唔會太濕。

而榨出嚟嘅甘筍汁唔洗嘥佐佢，當係清水嘅一部份，加入麵粉度一起搓成包皮，咁色水又靚啲，食落都開心啲㗎~~

而且，內外都有甘筍，表里可達到一致嘛~~

個餡嘅基本材料就係咁：


1、豬肉先用「鹽、糖、生粉、蘑菇精（或雞粉一類）」加少少水，攪至起膠。

鮮肉一般我會先攪好味道，最後再加入其它任何配料撈勻，唔好所有材料加埋再落鹽糖依類調味，肉會唔夠滑。

2、落香菇粒、出佐水嘅甘筍、一粒墨魚丸剁碎增加彈牙嘅口感、一大匙蔥油，增加香味，若無蔥油，改以麻油亦可。

所有材料撈勻，即成鮮肉內餡。

為佐包包更均勻，我將佢哋預先分成一粒粒乒乓波咁大嘅肉球。

可以見得到，個肉餡好乾身，唔會太濕，依個係由於甘筍先出過水先有咁嘅效果。

但係如果太乾身，咁蒸好出嚟嘅包包就失去佐肉汁，食落無咁滑，所以整餡第一步，幫鮮肉較味嘅時候，水嘅份量，就不能太多，水太多，蒸好嘅包會瀉開，因為肉太散而令到包變扁，水過少，食落就會乾爭爭，所以實際落幾多水，就要視乎你個肉餡有幾多，慢慢加水去攪拌，用手感，自己去判斷，試多幾次，就可以掌握到基本上嘅比例，因為我係一邊攪一邊加水，所以無一個比例可以話俾大家知，都一樣係感覺行前~~

做饅頭就切好後一個個直接蒸，做包只不過係將切好一舊舊嘅麵，再搓成圓形，然後將餡包入去咁解。

所以要整中式大包，首先要學識點整饅頭，饅頭搞掂佐，整包包，話咁易~~

至於點樣包靚個包包，其實我都無太多講究，有句說話講得好「包子好吃不在褶子上」，包得唔靚又點姐，最緊要個餡，較得好味~~





少量甘筍汁，顏色恰到好處地金黃，唔會太淡，亦不會太濃，非常滿意。

蒸好後嘅色澤會明顯變深，金燦燦，好靚咧~~

因為個餡都差不多大細，所以整出嚟嘅包，基本上都會差不多咁大細，所以個餡，其實好決定佐個包嘅大細程度，同埋如果個餡捏得唔夠實，蒸好嘅包，好易「瀉」開成好扁嘅包包，個包唔夠挺身，咁就無咁靚啦。

按慣例，切開嚟睇下~~


可以清楚食得到鮮肉嘅汁，又滑又爽口，加佐香菇粒，整個包嘅味道層次豐富佐，加佐墨魚丸中，口感變得不那麼單調。

幾好~~~





尋晚嘅晚餐，涼瓜炒牛肉。

1、先用「一細匙蠔油、少量鹽同糖、生粉水、薑絲、酒」較好牛肉嘅味道，較好味之後最後落少少麻油同稍多啲嘅花生油，攪一攪，令到牛肉鬆馳。

2、薑絲入邊嘅酵素可以令到牛肉變淋，係天然嘅鬆肉物質，所以我會落一大扎嘅薑絲同牛肉一齊醃，唔洗落咩鬆肉粉一類嘅化學嘢搞到牛味全無，不過薑嘅酵素不宜浸得牛肉太耐，所以一般我會係炒之前嘅半小時之內先開始醃，味道絕對係夠嘅，因為食牛，要牛味，大於醬料嘅味道嘛~~

3、醃好牛肉嘅味道放埋一邊，將涼瓜切粗條，用滾水煮一煮出水，去佐啲苦澀味同埋減少炒牛肉嘅時間。

4、十幾粒豆豉浸淋佢，用刀背略略剁幾下易出味。


開始可始快炒：

落豆豉入油鑊爆出香味，倒入出過水嘅涼瓜炒一炒有香味，撈起。（若用生蒜，此處同豆豉一齊爆出香味，我用熟蒜蓉，所以可以後落）

火翻炒牛肉七八下，落少少水，蓋住焗一分鐘，揭蓋，倒入一細匙蒜蓉同頭先炒過嘅涼瓜兜均即可鏟起。


一碟快手小炒，話咁易，好好餸飯~~~

一條脆肉瓜，少少豆卜，甘筍，木耳，炒埋一大碟~~~

開飯~~