蜜糖腰果、炸蔥油

我係一個極度鐘意果仁嘅人。

每一日飯後都要食幾粒果仁，腰果，杏仁，開心果，花生，瓜子，核桃求其乜都得，所以屋企幾乎全年係一定要備有些許果仁係屋企以滿足自己嘅需要。

早幾日買佐磅腰果，半煎炸熟佢。

雖然阿媽話用焗爐焗較好無咁油膩，不過我始終唔係太識得控制焗爐嘅火候，成日都會焗過火或者焗唔夠火，無謂嘥佐佢嘛。

所以依照傳統方法，炸腰果，較容易控制火，睇得清清楚楚，一轉色就撈起，擺係吸油紙度，其實食落都唔會覺得油。

就唔會落得太多油，少少薄薄一層油，多翻炒幾次，一樣炸得香脆脆。

炸好的腰果，用吸油紙吸走多餘嘅油，趁熱嘅時候，倒入一大匙蜜糖，撈勻，擺入雪櫃，凍佐可食。

因為蜜糖係後加入去撈勻掛係腰果上，全程無加熱過，所以蜜糖嘅味道同營養價值全無破壞，食嘅時候，好香濃的蜜糖味加埋香脆嘅腰果，絕對係一款食到停唔到口嘅最佳零食。

因為蜜糖熱佐會融，所以我會擺係雪櫃慢慢食，講起又想食添，依家再去拎幾粒出嚟慢慢嚼。

炸完腰果嘅油唔會浪費，因為要炸蔥油。

蔥係紅蔥嘅蔥，將紅蔥打豎切片，唔好打橫切， 打橫切炸好後好易變得太散睇唔到料。

香港買到嘅紅蔥有幾種，一種係較大粒圓形一包包出售嘅紅蔥頭，另一種係比較少見嘅一扎扎賣，尖圓形嘅紅蔥頭，色澤更為紫紅色，前者雖然較平，但蔥香味遠不及後者嚟得濃香，不過如果搵唔到，求其咩紅蔥頭都無妨。

炸嘅步驟就好簡單，慢火煎到蔥頭變金黃色，不過如果紅蔥太新鮮水份太多，就好難炸到酥脆，不過我唔係要紅蔥酥，而係要蔥油，所以就無所謂炸到幾酥脆，只要睇到蔥頭轉金色，聞到油入邊香噴噴嘅蔥香味，咁蔥油就炸好啦。

一扎紅蔥頭，炸好後都係得咁樣一碗仔咋~~~

蔥油嘅使用就非常非常廣泛，撈飯撈面，加一大匙入去，香噴噴，或者烚好的菜，淋一匙蔥油再配少少蠔油，香噴噴到咧，講不出口~~~


廣東人傳統上做腸粉嘅醬汁，或者做叉燒包嘅芡汁，就一定會落埋適量蔥油，先可以搵得返果種味道，而蔥油的做法，就係如此簡單~~


因為已經係煎煮過嘅油，所以算係熟油，可以直接食用，無論煮啲咩餸，最後包尾俾上一細匙，成碟餸都變得無與倫比㗎~~


如果係用豬油去炸嘅油蔥酥，嘩，果種香味，更加無可匹敵。


我屋企係食花生油，所以退而求其次，炸出來的蔥油，已是香飄千里，非常滿足。

碌一碗仔銀絲麵，落生抽醋糖肉醬，再加埋一大匙蔥油，撈一撈可食。

滿足到不得了~~~

晚上煮餃子夫妻倆個食。

除佐醬汁，額外俾多些許蔥油加上蔥絲，味道即刻升高幾級。


下次若再遇上售賣紅蔥，一定要買多啲返嚟炸定擺住，隨時可享美味~~