金針雲耳蒸雞

菠菜唔知點解，又係阿媽自細極少炒嘅菜。

所以自己好少會主動諗起要食菠菜。

依一日見菠菜似乎幾新鮮，就買佐扎，用蒜蓉炒。

好爽甜，真係唔錯，以後要多啲買嚟食先得。

係雞檔買佐半邊雞，雞檔代為斬件雖然方便，但於清潔一事上總是所保留，所以多數會買返嚟自己洗乾淨再斬件。


煮餐飯於我來講，煮得簡單，食得開心，先係最成功。

最怕要左思右度，左搵右砌，煮得餐飯，胃口都無哂，所以，簡單，好味，永遠係我嘅選擇。


依晚整一款最簡單的「蒸雞」，材料屋企基本上都會備有，缺少一二味配料其實影響唔會太大，所以話整就整。


1、斬好件嘅雞塊，先用「豉油、糖、生粉、白酒、麻油」醃好味道，再切少少薑絲預備。

2、木耳同金針菇浸軟，煎去頭尾，修齊整。

3、臘腸大半條切薄片。

4、紅棗三四粒切半，杞子適量。


上述所有材料，撈勻，擺入蒸碟，基本上就搞掂，等住開飯就可以。


食得重味者，可以適當地再加啲鹽入去，不過始終建議大家，食淡啲啲，對腎臟負擔都輕啲，家下咩食物都有重金屬，對身體已經好大負荷，所以盡可能的，食淡啲，幫輕下身體嘅運作，自己健康啲，家人都開心啲~~~~

水滾後擺入蒸碟，中大火蒸15分鐘。

拎起可食~~~

簡單到咧~~

但真係好好味㗎~~

開飯~~~

蒸水蛋

連日嘅大雨，無心機整咩餸。

簡單地係樓下商場買佐一個生菜，少少免治豬肉，加埋屋企嘅蛋，已經可以整到一個晚餐。

生菜油鹽水碌熟，點蠔油伴食。





蒸水蛋雖然容易，但要蒸得恰到好處地軟與滑，卻需少少技巧。

一般一碟水蛋，兩隻蛋已足夠。

開蛋嘅水，最好用和暖滾水，如果想味道再香啲，可以用高湯代替。

忌用生水，若用生水蒸出來的水蛋會有蜂窩狀，盡顯老態，非常不美。


蛋同水嘅比例，一般1：1.5

用嘅係比較細身嘅走地雞蛋，二隻蛋只得約摸140ml ，按比例，咁就需要加入210 ml 嘅高湯，我直接用量杯度量，所以除佐原有嘅蛋液，我只需要加足夠到350 ml嘅位置，咁就可以將蛋同高湯攪勻。

用量杯比較準確。

同埋未知係咪因為量杯係塑膠同埋較為高身嘅緣故，打好嘅蛋液，全無泡泡，非常好處理。

因為打蛋嘅時候因為打入空氣嘅緣故，總會產生細泡，而蒸水蛋嘅時候，最好刮走啲泡泡，咁蒸好後先唔會有一個個泡泡脹暴之後的痕跡。

除佐蛋，再準備一個咸蛋黃同些少免治豬肉，免治豬肉無需醃味亦可，我就無醃味。

凈蛋蒸出嚟嘅味道未免單調，奶奶教落，落啲咸蛋黃同瘦肉，可增加香氣與鮮美。

因為幾鐘意麻油嘅香味，所以蛋液入邊加入一細匙麻油增加香味，總加佐一細細匙白酒避走蛋腥味。

將攪好嘅蛋液同咸蛋及肉碎略攪勻，即成蛋液，倒入蒸碟度，可上鑊蒸。

為免倒汗水影響到水蛋嘅表面，搵佐同樣大細嘅一個碟，蓋係蒸蛋嘅碟上，你亦可用錫紙或耐高溫保鮮膜代替，不過，總不若一個碟嚟得安全與健康。


通常蒸任何食物，我都會水滾之後先擺食物上去。

蒸蛋亦不例外。

水滾後，擺碟上鑊，轉中火1000火，蒸12分鐘，唔揭蓋焗多二三分鐘。

一個完美無缺嘅蒸水蛋，完成~~~~

因為唔想食得太咸，所以蛋液入邊除佐高湯並無落鹽，所以我會蒸好嘅蛋，落多少少蒸魚豉油，增加醬香之餘可做調味之用。

當然，如果你對於蒸水蛋無乜要求，可以無視以上全部所講~~~

我同強哥，就真係愛極咁樣一碟「極滑、極香」嘅蒸水蛋撈飯~~

糖漬檸檬

極喜歡檸檬天然無敵的清香。

平時總會買些檸檬泡泡茶喝，清清腸胃，泡過茶的檸檬最後用個小碟子裝起擺進雪櫃，一室的檸檬清香。

非常地物盡其用。

檸檬可咸飲亦可甜食。

一個簡單到幾乎不用腦子的糖漬檸檬。

用熱水清洗乾淨檸檬表皮，切片。

取小碟一隻，檸檬片兩面均勻地沾上砂糖。

這樣的好處是醃好的檸檬不會一味地甜與膩，飲時若覺不夠甜，可添加少量蜂蜜，再加清甜。



將沾滿了砂糖的檸檬，放入洗凈烘乾的玻璃樽之內，置入雪櫃一日之後可取出食用。

取三數片厚切的檸檬，加上梳打水或是清水，放入冰塊，加上適量蜂蜜，把檸檬擠出味道，即可飲用。

有通便排毒美白之功效，女士最佳的美容飲品。

簡單~~~





前幾日感冒不適，喉嚨乾涸，不適之極。

切新鮮檸檬數片，在表面洒上一點點可接受的細鹽，略醃十數分鐘，而後倒入極熱滾水半杯，趁熱，一飲而盡~

睡一覺起床感冒症狀大減，喉嚨痛狀全消。

只因鹽與檸檬遇熱會釋放出一種天然的消炎質，咸飲熱檸檬水，是最天然的感冒茶。

醬燒排骨。

排骨與薑略炒，放入甜麵醬與麵豉醬，翻炒。

加水燜煮半個鐘。




加入豆角，開中細火燜多三個字。

有菜有肉，一人一碟頭飯，滿足~~

清清哋

依兩日食得清清哋，幾好。

買佐啲荷豆，碌一碌熟佢 。

同臘腸炒埋一碟。

其實我平時落甘筍，唔凈止為佐視覺上靚啲，更重要係我真係好鐘意食甘筍，所以多少都會落啲入去。

灼完荷豆嘅熱水唔會嘥，隨之蒸埋一碟茄子。

茄子切粗條之後，就咁上鑊蒸十分鐘左右即可。




準備一個醬汁

「蒜蓉、麻辣醬、黑醋、砂糖、麻油、蘑菇素」撈勻即成醬汁。

將醬汁淋上蒸好嘅茄子即成。

酸酸甜甜，好開胃~~

尋晚簡單地炒一個小棠菜。

煎一個豆角炒蛋，搞掂~~~

全部都係小炒，無乜難度~~

晚餐

返去奶奶度食飯，煮佐好多靚餸。

豬肺菜乾湯。





渣撈起，豬肺點辣椒豉油，好好味。

老爺整佐好多煎炸嘢，知後生鐘意嘛。。。

春卷，味道較得好好。。。。

酥炸金蠔。。。

炒蝦球。

冬菇燜鴨亦。

煎讓三寶。

賣相唔好，味道一流嘅南乳薯仔燜鴨件。

蒸條魚。。

蠔汁鮮竹卷~~~

加上外賣白斬雞，人齊開飯~`

香菇甘筍鮮肉大包

早排成日整包都得閒擺上嚟，依幾日連續POST整大包啦。

依款包包係隨意之中整出嚟，味道我覺得好好嘅一款大包。。。。

包包嘅皮已經不在討論範圍，因為以前做法已講過好多，所以主要係想講個餡嘅調配。

如果對於包包嘅皮未有了解嘅，可以參考我依個做法「請點擊此處」

依日，整甘筍大包。


長期備有甘筍，所以整包包，臨時無材料配搭嘅時候，少少豬肉加埋雜七雜八，就可以做出一個餡。

甘筍若手工切會稍粗，做為包包嘅餡嚟講，於口感上唔係太美，所以我就用個擦，三分一截甘筍，全部刨成絲。

刨好嘅甘筍，俾幾粒鹽入去，撈勻停一陣，自己就會走好多甘筍汁出嚟。

咁樣甘筍入邊無太多水份，蒸好嘅包包都唔會太濕。

而榨出嚟嘅甘筍汁唔洗嘥佐佢，當係清水嘅一部份，加入麵粉度一起搓成包皮，咁色水又靚啲，食落都開心啲㗎~~

而且，內外都有甘筍，表里可達到一致嘛~~

個餡嘅基本材料就係咁：


1、豬肉先用「鹽、糖、生粉、蘑菇精（或雞粉一類）」加少少水，攪至起膠。

鮮肉一般我會先攪好味道，最後再加入其它任何配料撈勻，唔好所有材料加埋再落鹽糖依類調味，肉會唔夠滑。

2、落香菇粒、出佐水嘅甘筍、一粒墨魚丸剁碎增加彈牙嘅口感、一大匙蔥油，增加香味，若無蔥油，改以麻油亦可。

所有材料撈勻，即成鮮肉內餡。

為佐包包更均勻，我將佢哋預先分成一粒粒乒乓波咁大嘅肉球。

可以見得到，個肉餡好乾身，唔會太濕，依個係由於甘筍先出過水先有咁嘅效果。

但係如果太乾身，咁蒸好出嚟嘅包包就失去佐肉汁，食落無咁滑，所以整餡第一步，幫鮮肉較味嘅時候，水嘅份量，就不能太多，水太多，蒸好嘅包會瀉開，因為肉太散而令到包變扁，水過少，食落就會乾爭爭，所以實際落幾多水，就要視乎你個肉餡有幾多，慢慢加水去攪拌，用手感，自己去判斷，試多幾次，就可以掌握到基本上嘅比例，因為我係一邊攪一邊加水，所以無一個比例可以話俾大家知，都一樣係感覺行前~~

做饅頭就切好後一個個直接蒸，做包只不過係將切好一舊舊嘅麵，再搓成圓形，然後將餡包入去咁解。

所以要整中式大包，首先要學識點整饅頭，饅頭搞掂佐，整包包，話咁易~~

至於點樣包靚個包包，其實我都無太多講究，有句說話講得好「包子好吃不在褶子上」，包得唔靚又點姐，最緊要個餡，較得好味~~





少量甘筍汁，顏色恰到好處地金黃，唔會太淡，亦不會太濃，非常滿意。

蒸好後嘅色澤會明顯變深，金燦燦，好靚咧~~

因為個餡都差不多大細，所以整出嚟嘅包，基本上都會差不多咁大細，所以個餡，其實好決定佐個包嘅大細程度，同埋如果個餡捏得唔夠實，蒸好嘅包，好易「瀉」開成好扁嘅包包，個包唔夠挺身，咁就無咁靚啦。

按慣例，切開嚟睇下~~


可以清楚食得到鮮肉嘅汁，又滑又爽口，加佐香菇粒，整個包嘅味道層次豐富佐，加佐墨魚丸中，口感變得不那麼單調。

幾好~~~





尋晚嘅晚餐，涼瓜炒牛肉。

1、先用「一細匙蠔油、少量鹽同糖、生粉水、薑絲、酒」較好牛肉嘅味道，較好味之後最後落少少麻油同稍多啲嘅花生油，攪一攪，令到牛肉鬆馳。

2、薑絲入邊嘅酵素可以令到牛肉變淋，係天然嘅鬆肉物質，所以我會落一大扎嘅薑絲同牛肉一齊醃，唔洗落咩鬆肉粉一類嘅化學嘢搞到牛味全無，不過薑嘅酵素不宜浸得牛肉太耐，所以一般我會係炒之前嘅半小時之內先開始醃，味道絕對係夠嘅，因為食牛，要牛味，大於醬料嘅味道嘛~~

3、醃好牛肉嘅味道放埋一邊，將涼瓜切粗條，用滾水煮一煮出水，去佐啲苦澀味同埋減少炒牛肉嘅時間。

4、十幾粒豆豉浸淋佢，用刀背略略剁幾下易出味。


開始可始快炒：

落豆豉入油鑊爆出香味，倒入出過水嘅涼瓜炒一炒有香味，撈起。（若用生蒜，此處同豆豉一齊爆出香味，我用熟蒜蓉，所以可以後落）

火翻炒牛肉七八下，落少少水，蓋住焗一分鐘，揭蓋，倒入一細匙蒜蓉同頭先炒過嘅涼瓜兜均即可鏟起。


一碟快手小炒，話咁易，好好餸飯~~~

一條脆肉瓜，少少豆卜，甘筍，木耳，炒埋一大碟~~~

開飯~~

食大包、炒藕丁

做佐幾個大包當早餐，一次只能食一個的超級大包~~~

大包整多兩件，大包整多兩件唔怕滯~~~

真係大包嚟㗎~~~




因為係臨時想整下肉包，雪櫃有一塊肉，剁好調味，晚餐食凈少少菜心，剁碎準備。

再浸少少木耳，加啲冬菜，撈埋就成為個餡。

係，我額外俾多少少甜麵醬，依排好鐘意用甜麵醬，覺得好香。

依度睇唔到個比例，其實係好大一舊餡㗎~~

 

上籠蒸~~

發發發~~

菜肉大包，整好啦~~

國際慣例，剝開嚟睇下。。。


不過依次嘅餡唔係太滿意，因為實際上，我撈餡嘅時候，菜心唔記得先出一出水，所以蒸好嘅包包好濕，失敗，同埋我落得菜多過肉，所以食起上嚟個餡有少少鬆散，唔得夠實，又失敗，整好後先醒起，青菜最好唔要食隔夜，咁菜肉包應該都一樣啦，唔好唔好。。。


最好嘅唯一係個味，個味真係幾香㗎，不過，下次都係唔整依個餡羅~~~

炒兩味小菜做晚餐。

青椒炒甜肉。

麻辣孜然藕丁。

蓮藕切丁，出一出水備用，鑊落少少油，爆香一匙孜然，用油爆過嘅孜然香味先會出嚟，不過要好細火炒先可以留得住孜然嘅香味而唔係「火農」味，然後倒入藕丁，落一細匙嘅麻辣醬，落鹽、糖調味，起鑊前澆上一湯匙的黑醋，兜均即可~~~

雖然好簡單，不過味道極濃香，勁送飯~~~

鐘意~