蒸飯

之前一日，用佐大半邊嘅雞整雞煲，凈返嘅細半邊，提早一日，抹一層鹽焗雞粉係雞度，醃佐一日一夜。

第二日，蒸飯。

蒸飯，生米煮成熟飯嘅其中一個方法，只不過唔係用電飯煲煮，而係用個碟，將生米浸住水，擺上鑊隔水蒸熟嘅步驟。

水同米嘅比例按電飯煲煮飯用嘅水量差唔多，因為唔同嘅米食水量唔同，蒸一次，覺得太腍咁下次落少啲水，如果覺得蒸出嚟硬佐下次就落多啲水。

洗好米，添水入碟，然後隔水中火蒸二十分鐘，熟佐之後唔揭蓋焗多十分鐘即成。

蒸飯係咁簡單，比電飯煲煮總要快，煮得米少蒸飯最適宜，口感比電飯煲整總要好。

 

咁蒸飯嘅同時，順手蒸埋果邊半雞。

我係等飯煮佐大約十分鐘左右，收佐水，再揭起個蓋，擺雞上去碟飯度㗎。

舖多幾片薑，蒸多二十分鐘，搞掂。。。。。

 

就咁簡單咋，除佐要落夠水，其它乜都唔駛理啦。。。

 

最正係底下碟飯，縮佐雞汁嘅味道，加埋薑嘅味道，好正啊。。。

 

我其實唔係太識斬雞，都係斬過幾次咁大把咋，不過一次比一次有心得，相信下次會斬得再靚啲~~~

碟雞細細一碟，三幾下搞掂~~

炒多碟生菜，依家嘅生菜真係多汁又清甜，食多啲菜無妨~~~

 

嚟緊半個月會外游，所以要清佐雪櫃啲食物，早幾日打邊爐食凈半邊蘿蔔，加埋少少牛肉，一大匙味噌，滾佐一個簡單嘅湯水。

 

雖則簡單，但不失美味~~~

 

要消失一段時間啦，等我返嚟，再煮過絕對食肥人嘅餸菜俾大家睇啦。。。。

不過，可能突然一日，覺得要開始食素，都未定㗎~~~