簡單一餐---薯仔燜雞扒

 

尋晚嘅晚餐。

凈有一煲豬肚湯，開火整返熱就食得。

隔佐一晚，總入味~

 

雪櫃有三分二大嘅雞扒，兩隻薯仔。

咁就整一味至簡單不過嘅餸----薯仔燜雞扒

雞扒就先用豉油糖胡椒粉酒，醃三個字左右。

所有材料簡單到隻不過係「薯仔切大舊、雞扒、蒜頭」

 

做法：1，就咁凈鑊，唔駛落油，將雞皮煎到出油，可以開中火，咁快速煎封表面，同埋雞皮啲油逼出嚟。

2，倒入蒜頭煎一煎

 

3，用一把鉸剪，將雞扒就咁剪開幾舊

4，倒入薯仔，加豉油糖，一大匙黑椒醬，加水燜十五分鐘後熄火

 

薯仔同雞扒都係好快熟嘅嘢，所以中火燜得十五分鐘左右就搞掂。

燜嘢唔駛一味咁開火燜㗎，燜熟之後熄火焗得五分鐘，等佢冷卻，啲味先至會縮入去，我落多少少水，咁等味餸多啲汁，撈飯一流。

咁熄火後焗多十分鐘，好似總係啲汁好稀咁喎，點解決咧。。。。

 

好簡單，開返個生粉水倒入去，再開火兜一兜，即刻上色同個汁又靚又正~~

再開開火，個薯仔本身嘅澱粉質都走佐出嚟，唔駛落好濃嘅芡汁，本身都會好結㗎。。。。。

 

二十幾分鐘，一味又簡單又惹味嘅黑椒薯仔燜雞扒就搞掂啦。。。。

 

啲汁愛嚟撈飯，正~~~

 

一味人人整得到嘅餸菜~~~