芋頭扣肉、酸辣薯仔絲

上次整扣肉，已是一年前的事，本打算今年過年也同樣做扣肉回去食年飯的時候大家一齊食，因為身體上的不適，就打消了念頭。

強哥念念不忘我做的芋頭扣肉，年夜飯無食到，咁依個小年夜，總得成全他的願望。

尋日年宵，整佐份扣肉~~~

強哥一入屋企，睇到冒著濃煙的芋頭扣肉，馬上除佐包包，入房換好衫，進廚房快速地自動地取好碗筷然後企住係檯邊就等我影完幾張相即刻開飯~~~

用嘅係黑毛豬，肥肉稍厚，但係肉味更為濃郁，層次分明，足有六層之多~~

提早一日處理好肉，水煮好定型再炸好皮，抹上老抽讓皮上色之後擺入雪櫃一晚，第二日凍佐會比較好切片。

買佐一個好大舊嘅芋頭，因為肉較多，我以為要用哂成隻芋頭，點知原來一半已經足夠~~

芋頭切片落油炸一炸過表皮，咁樣蒸嘅時候無咁易化哂~~

調味跟足媽媽的做法：「腐乳數塊、蒜頭、蔥頭、老抽、冰糖、適量五香粉、紹酒」

加水將調味化開~~

將肉同芋頭都過一過腐乳汁，然後再按一塊肉一塊芋頭咁排好係碗度。

排好嘅肉，將剩餘的汁倒埋入去一起蒸~~

依次整佐兩碗，有排食啦~~

排好嘅肉，用快速煲隔水蒸五個字就足夠啦~~~

入口即融嘅五花肉，吸收哂腐乳嘅香味，一啖肉一啖芋頭，真係神仙都要跌倒~~

正~~~

本嚟想食返之前一日果種白菜芯嘅，點知樓下幾檔菜檔都無貨喎，懶得行去太遠買，咁就求其買佐個大薯仔返嚟，炒一味「酸辣薯仔絲」

如果用刨去刨出嚟嘅薯仔絲，會因為太幼，炒好後就無佐果種爽脆嘅口感，所以唯有辛苦啲，手工切薄片再切成絲~~

手工切可以自己控制粗幼，我就切得略粗少少（比絲略粗，幼過條狀），因為薯仔澱粉質較多，所以切好絲後，要過多幾次水，以去除其中的澱粉質。

個薯仔真係勁大㗎，睇下，一個薯仔咋，切好後，成盤咁多~~~

 

酸辣薯仔絲炒法：

1、落油爆香少少花椒粒，然後將花椒取出棄用，咁油入邊就有佐花椒嘅香味。

2、落少少乾辣椒略爆出香味

3、倒入薯仔同甘筍絲（落甘筍只不過係為佐增加視覺上的愉悅感覺）略炒至變透明

（因為薯仔較幼細，所以炒二分鐘左右基本上就熟㗎啦）

4、然後快手落醋同鹽俾味，落少少雞粉，最後灑入一把蔥段，炒勻裝碟~~

 

酸酸爽爽，好惹味好開胃~~~

兩款小菜，是日晚餐~~