蕃茄煨寬麵、腸仔包、糖水

耐唔耐食下麵仔幾開心。

尋日煮寬意麵，蕃茄醬汁配搭。

快靚正。

蕃茄醬好易整，成個過程一氣呵成~~

1、免治豬肉凈鑊炒散炒出香味

2、跟手落牛油一舊，爆香洋蔥碎，落芝士腸炒出香味

3、落茄膏炒出香味

4、落水，俾啲喼汁，鹽，糖，白醋，意大利雜香草調味，開火煮10分鐘左右。

5、最後埋返個芡，搞掂~~~

因為我比較鐘意酸甜味，所以落佐白醋增加個酸度。

意麵先用水煮腍，然後倒入預先煮好的蕃茄醬拌炒，跟手倒入烚好的甜豆，落一大扎芝士，趁熱炒勻，搞掂~~

麵就無烚得過腍，因為你要預炒嘅時間總會加熱，所以要預返一個度，咁炒勻醬汁之後食起上嚟都可以保持得好彈性。

好味。。。。

蕃茄醬入邊用嘅腸仔如下圖所示，脆皮芝士腸，味道又好又經濟，愛嚟整腸仔包都好一流㗎~~

搓少少麵，整幾個包包做早餐。

按我一向的做法，搓好麵直接就包餡，然後上鑊發酵半個鐘再蒸，做法簡單，整包都輕鬆好多~~

發得幾靚~~

長果條肉龍，無影到相，用返舊相，就直接係麵皮上舖薄薄一層肉，然後卷起即可。

肉少少調下味，無咁單調又唔會膩，我最鐘意食~~~

迷你腸仔包，發得勁靚㗎，強哥至愛~~~

好似麵包咁，層次分明，又鬆軟，食起上嚟又無麵包咁油，又絕無添加劑，自家制自家食，當然超級正~

晚上整煲糖水飲下。

做法就唔講啦，有興趣可參考以前寫過。

「腐竹白果糖水做法」

不過白果就無需用焗爐整，直接係電陶爐上燒幾下，好方便~~~

甜蜜蜜，暖笠笠~~

薯仔燜排骨

總有白菜芯同肥牛凈，咁晏晝就索性兩味炒埋一碟，以峇拉煎醬調味，咦，又真係好好味喎~~~

飯面蒸條潤腸一條臘腸，簡單~~

前晚嘅杞子葉都總有凈少少，一模一樣滾多個湯。

晏晝簡簡單單又一餐~~

點都好過強哥係出邊諗嚟諗起唔知食乜好~~

晚上，求其滾個湯。

雪櫃有乜就煮乜。

少少咸菜，肉碎，豆腐。

全部加埋滾返啖湯飲。

不過，味道好怪，大家都係咪試啦。。。。

煮個肉俾強哥個食肉獸。

材料：甘筍加色，薯仔加味，肉排一盒仔。

香料：「八角、花椒、蒜、香葉」

做法：

1、少少油，爆香花椒，然後將花椒撈起棄置

2、落蒜頭，買餸送佐一條蔥，勁大棵，將蔥白切細粒，加埋一起爆香，好香㗎。

3、倒入排骨略炒至變白色（因為排骨較少，加埋少少雞亦）

4、加水，豉油、酒、糖、鹽調味，然後開火燜煮20分鐘左右。

因為依個汁超級香，強哥最終意用佢嘅汁撈飯，所以水落多啲燜，咁最後，再打返個芡等汁濃滑啲。

香噴噴到不得了的薯仔燜排骨~~~

醬汁炒肥牛、杞子葉滾瘦肉湯

細個時見菜如見虎，食多啖都覺得苦。

幾乎係要阿媽又逼又氹之下先食幾條應付佢。

不過原來人長大佐，自自然然唔洗逼就會食返菜喎。

幾乎係咩青菜都鐘意食，不過最鐘意係一種白菜芯。

本嚟都唔識得食，係早幾年有一次舅母過嚟搵我飲茶，飲完茶同佢行佐轉旺角街市，佢見到有依款白菜芯賣喎，即刻買佐斤返去，咁我自己又試買斤嚟食，咦，原來真係好甜好腍好好食~~

每年好似得冬天過年前後依段時間有賣，尋日見到有賣，即刻買佐兩斤返嚟。

簡單地蒜蓉炒，已經好好味~~

有菜都要有肉。咁就煮碟肥牛俾強哥~~

肥牛配燒肉汁最方便煮。

其實咩燒汁都無所謂，我就用佐下圖依支早排買返嚟燒嘢用嘅。

依家好多零食舖都會有韓國食物出售，通常都會有好多燒肉汁選擇，買定枝罷屋企總是無錯的。

做法：

1、肥牛先出出水，輕輕過一過水就撈起，無煮得太熟，略帶粉紅色即撈起。

2、然後落鑊炒洋蔥同甘筍，俾少少鹽炒至軟身

3、倒入肥牛

4、倒入燒肉汁，同肥牛炒均味道。

因為燒肉汁較甜，所以我落多幾粒鹽去中和個甜度，因為係要回鍋再炒過，所以第一次肥牛出水就唔好太熟，略略過過水係等佢炒起無咁多油出嚟。

燒汁要加熱炒一炒過先出香味，所以要同肥牛再一起炒一炒，肥牛炒得耐就會好韌，所以只能快速地大火地略炒幾下就好盛起。

勁惹味的醬汁炒肥牛~~~~

1、買佐扎杞子葉愛嚟滾湯飲。

2、煮法超簡單，先煲滾水，落少少杞子

3、略煮出味道之後，落札子葉

4、最後落瘦肉（我用免治豬肉整佐幾粒肉丸），肉煮熟之後俾鹽調味，搞掂~~

札子有一種好獨特的香味，我覺得似係一種較為清新的類似焦糖咁嘅味，以前一直以為札子無味，但如果真係去聞，札子的味道，其實好突出，加埋札子葉落去，啖湯好好飲~~~~

全家福~~~

 

 

蕃石榴煲雞湯

蕃石榴對於降血脂同降血糖有極好的作用。

唔知從幾時開始，阿媽幾乎每日都要食一個蕃石榴，無斷過㗎，我就一般般鐘意，覺得佢無乜味，後嚟阿媽教我，可以點梅粉同食，咁味道就無咁淡，對身體又有益，叫我經常買啲返嚟食。

有幾隻蕃石榴買返嚟擺佐好多日，唔想食，又唔想咁嘥掉佐佢，所以上網查佢嘅食法，原來可以同雞一起煲湯喎。

依款湯據聞有生津益氣嘅功效，咁就即管試下如何。

我屋企總有啲黃芪同埋紅棗，大家都可以活氣補血，我諗加埋應該唔會有衝突。

「題外話：我每日都會焗一杯「黃芪紅棗水」嚟飲，好簡單，兩片黃芪剪細塊，紅棗七八粒左右去核剪碎，擺入保溫杯度，然後衝滾水入去，蓋住焗佢半到一個鐘，然後就可以當水咁飲。

女仕飲用極好㗎，長期飲可以皮膚白白，而且雙頰緋紅，聽中醫師話，袪斑去黃效果都好一流㗎，其它人飲過效果如何我就唔知啦，我自己就真係面珠成日兩舊紅當當，胭脂都慳返~~」

講返正題，依款湯所用材料有：

「雞殼一個、蕃石榴兩個、黃芪適量、薑一舊、紅棗適量」

係雞檔買佐個雞殼，無咁多油，又有少少肉，我一次煲一細煲仔湯兩個人飲，份量就剛剛好~~~

當然大家都可以用其它任何雞代替~~

煲一個半鐘~~~

將渣撈起棄置，凈湯攤凍，然後將雞油片走~~

晚上再開火加熱，俾鹽調味~~

原來味道都OK喎，好甜啊啖湯，不過略有少少澀澀哋，應該係蕃石榴皮嘅關係。

既然有益嘅，咁以後耐唔耐，都可以煲返次嚟飲嘅~~

一斤茼蒿，炒起得一碟仔，出好多水~~

用峇拉煎醬炒，惹味到不得了~~~

煮多個蕃茄蛋。

蕃茄界十字，然後係電陶爐上燒幾下，即刻輕鬆將蕃茄皮取出~~

 

以前都係只敢用易潔鑊煎蛋，依次膽粗粗用個陽極鑊試下，咦，幾好喎，只要記得「熱鍋凍油落蛋液」，煎好成餅嘅蛋，真係唔痴底啊。。。。

勁有成就感。。。。

好送飯嘅蕃茄蛋~~~

全家福~~~

自製峇拉煎醬

我覺得峇拉煎其實就係「馬拉盞」的原本叫法。

係食肆食嘅馬拉盞味道，就係屋企自細叫慣嘅峇拉煎。

夏天無乜胃口食飯，阿媽就最鐘意用峇拉煎炒通菜，炒豆角，炒椰菜炒豆腐，好開胃㗎~~

今日介紹嘅依個做法，味道咸香之中帶甜酸，除佐愛嚟炒餸，總可以拌飯拌麵食，擦麵包擦饅頭都一樣OK㗎~~~

以前寫過另一種作法，就咸味偏重啲，有興趣可以睇返「馬拉盞製作」

食過咁多牌子嘅峇拉煎，始終覺得最好味係下圖依款，老牌子，我屋企人使用超過二十年，自細食到依家，個味道都無太大變化，係一般的東南亞食品店都可以買得到。

味道類似蝦醬咁嘅味道，如果接受得到蝦醬味道嘅朋友，不防一試~~

開出嚟睇下，係乾身一舊舊嘅款，略帶啡色，味道濃郁，煮一次，殘留係廚房嘅味道起碼要過兩日先可以完全散去~~~

因為佢係生嘅，所以每次使用，要先用油爆一爆出香味。

可以每次切細細哋幾粒出嚟，炒菜之前先用油爆一爆香佢，就可以愛嚟炒菜。

我嫌每次都要先切再用油爆先比較麻煩，所以一般會一次先切一磚嘅一半出嚟，加埋自己鐘意嘅配料去煮好個醬擺埋係雪櫃，起碼可以擺三五個月都唔怕壞，咁每次炒菜只需要炒好菜之後俾一湯匙煮好嘅醬落去就即時食得~~

如果嫌整醬過於麻煩，又鐘意佢嘅味道，完全可以每次要用嘅時候切一細細舊出嚟用油爆香佢直接炒菜。

佢本身係巨咸嘅，所以用佢炒餸，就完全無需再落鹽。

做法與材料：

1、先用油爆香一碗仔乾蔥頭粒

2、倒入切成細粒仔嘅峇拉煎膏入去，俾多少少油，慢火炒散。

3、落「花生醬、冰糖、指天椒粒、白醋」調味

糖要相應落多少少，因為峇拉煎膏係好咸好咸嘅，所以要落多啲糖中和個咸味，鐘意辣就落辣椒，唔鐘意就唔洗落，我就落佐自己用指天椒整嘅辣椒醬一匙，如果買得到青檸，可以落青檸水代替白醋，我因為無買到，就用白醋代替，同埋如果有「阿參」的話，加埋落去總香添啊。

阿參係一種黑黑嘅酸酸嘅植物，佢天然地酸味非常惹味~~~

煮煮煮到散開味道均勻即可~~~

每間餐廳都有唔同的峇拉煎醬做法，不過大致上「糖同青檸汁加埋阿參膏」係必有，我屋企人就會落舂碎的炒花生，我懶得炒花生，所以就用花生醬代替，落佐花生，會香好多好多㗎。

整好嘅峇拉煎醬，加上咖喱醬同椰漿，就可以煮出娘惹味嘅蝦同蟹啦，依個峇拉煎醬的做法，係東南亞人最地道嘅住家味道，香港餐廳食到嘅味道，講真，遠不及我自制嘅嚟得香濃~~~

有興趣不妨一試~~

臘味芋頭煲「食譜」

北京有一個女作家，出書之餘，會請演員演繹書中內容，並配埋與小說情節相符的歌曲，拍成一個MV做為書籍宣傳，並請演員扮演小說主角拍攝寫真畫冊同期係網絡，電視，報章等多渠道推出，多管齊下的攻勢，為的是增加小說的銷量。

無疑係非常非常新穎有效的宣傳手法，亦都配合埋時下年輕對網絡的依賴性，做到極好的宣傳效果。

揭過下類似的書籍，包裝手法如出一轍「優良的紙張裝訂，超大的文字印刷，圖文並茂的內容，昂貴的售價」

又係包裝華麗的速食文化。

本書拎起頗重手，文字看似頗多，但每揭幾頁就有一幅圖片，成本小說睇下就要被圖片打攪下，根本睇完之後，似明非明~~

 

可見文字已不需要得到尊重，因為文字已不是表達的唯一途徑。

影像與聲頻取代了文字的唯一性，現代人不需要文字帶來的想像，簡單直接的影音表現，更容易為人所接受。

但係無人深諗過，影像與聲音，是否可以好似文字咁，讓人在細嚼之中，得到回味與深層次的思考？無可否認，影像與聲音，更能在第一時間為人所接受，但係依種影音的停留，遠不及文字帶來的思考嚟得深刻同久遠，就自身體會，對於影音，睇完聽完，好快忘完。

可能要過多幾十年甚至數百年，先至會有人跳出嚟話，影音的世界，令到人類智商集體退化，我們需要文字，因為文字才能帶來思考的習慣，而思考，才會帶來進步。

 

如果覺得自己越來越無辦法「睇得落文字」，咁就要開始警惕下，依個係自身思考的能力，正在退化的跡象。

希望越來越多人，抽下時間，認真地，靜下心，睇下好書，形成自己的思考習慣。

~~~~~~~~~~~~~~~~~~~~~~~~~~~~~~~~~~~~~~~~~~~

尋日晏晝，香菇炒小棠菜。

蒸多碟飯，飯面蒸多碟隔夜扣肉，晏晝就咁簡單。

鏡中的世界，如此真實，卻遙不可及~~

晚餐。

滾個雪梨湯，清甜好味道。

 

整芋頭扣肉，凈有半邊芋頭。

愛嚟同臘味一起，整返一大煲美味。

 

「調味與材料」：

1、薑片、蔥白切粒、蔥段、紅蔥頭

2、臘腸、潤腸、臘肉

3、芋頭切大粒

4、腐乳一塊（加水攪碎）

 

「做法」：

1、臘肉全肥的位置割出嚟，係鑊中火煎至出油

2、利用煎出嚟的油，倒入薑片、蔥白、蔥頭，爆出香味

3、倒入切好片的臘味略炒出香味

4、倒入芋頭，加水，落豉油，冰糖，腐乳，酒，開火煮15分鐘。

煮熟後，倒入蔥段炒勻，轉入瓦煲仔，再開火焗多三分鐘，咁就可以食到熱辣辣，暖笠笠的煲仔上的臘味芋頭煲啦！~~

臘味的油脂與香味全數被芋頭所吸收。

芋頭的鬆化與臘味的香，成煲嘢，香噴噴到不得了，係汁少佐啲，失策·！！

所以大家煮嘅時候，水不防落多啲，咁汁就會多啲~~~

全家福~~~