食餅

剛收起厚被轉完熱天衫，今日天氣急降至十五度，總要落埋雨。

濕又凍，一家三口無出街，係屋企俾個仔玩足成日。

雪櫃有乜就煮乜。

一個薯仔一條甘筍幾條豆。

炒埋一碟仔，加個蛋。

炒個酸辣薯仔絲。

薯仔切絲浸浸水，洗走多餘的澱粉質，炒起上嚟先會爽又脆。

落油爆香花椒粒，等油有花椒味，掉佐啲花椒粒，再擺少少辣椒乾入去爆出香味，倒入薯仔絲，落黑醋炒炒，再落糖少少炒炒，最後落鹽少少，炒勻裝碟。

一細舊仔肉，原本係亞仔蒸丸仔用嘅，征用埋，醬炒。

落雨天唔想食飯，烙幾張餅，卷餸食。

完全係北方菜系。係北方館子食過，一試難忘，返嚟自己嘗試終於成功整到卷餅的皮。

所以幾時麵粉都係家中常備物資最有必要。


唔想食飯時佢就絕對幫到手。

麵粉一堆，滾水半杯。

用滾水搓成麵糰。

搓好後，醒一個鐘或以上。

將麵粉搓成一長條後，分切成均勻的一粒粒劑子。

再略略壓扁。

擦少少油係麵皮上。

針板亦擦佐少少油等麵粉唔會痴到針板度。

搭另一塊麵皮上去，咁中間就有一層油隔住佐。

將兩塊麵皮搓成一塊薄圓形。

功夫有限，搓成不規則圓形。

擺入平底鑊，唔洗落油，中火烙一分鐘左右，麵皮一熟，就會脹起。

翻個面再略略煎幾秒，即成。

因為中間有油的關係，煎好後好易就可以分開變成兩張餅皮。

餅皮依個時候就整好喇，煙煙韌韌，充滿麵粉的麥香味，非常一流。

閒時可以整多啲餅擺住，食用前略略蒸一蒸返熱就軟熟返。

好薄好軟，卷住任何自己鐘意嘅餸菜都無問題。

搭薯仔絲真係一流~~~

.
超超超好味~~~~