辣椒膏煮牛尾

買佐盒牛尾，本打算煲蕃茄薯仔湯嘅，亞仔至愛依款湯水，不過拖下拖下又無整到，再擺就變味喇，雪櫃有婆婆整俾媽咪嘅辣椒膏，一於用辣椒膏煮牛尾。

牛尾先煎至表面金黃，猛火煎幾下就OK。

辣椒膏係用大紅椒同蔥頭整，未算太辣，取其色同椒香味。

剁碎的辣椒同蔥頭一比一的比例，攪略碎，又唔可以太碎，要保持返個粗粒口感。。

用油炒香，一次整多啲，擺入雪櫃可能慢慢煮餸用，只要油炒熟透，擺三兩個月不成問題。

煮牛尾，取一大匙辣椒膏，加入一大匙黃薑粉，幾大匙椰絲，半個青檸汁，落鹽同糖俾味，加水煮至牛尾淋軟。

煮至剛剛好收汁，略略濕，等醬汁剛剛好掛係牛尾之上，食得~~

一味餸，開飯~