糯米釀苦瓜

天熱人無乜胃口，求其滾個粟米羹，煮多碟菜，即刻逃離廚房的魔掌。




夏天食苦瓜又合時又合宜，尋晚整佐一味客家人風味嘅糯米釀苦瓜。

食過正宗客家人整嘅，糯米稍多，肉及其它配料預先炒熟再撈埋糯米釀入苦瓜度蒸，口感上稍嫌鬆散，所以自己略做改動，變得更適宜自己屋企人嘅口味。

1、糯米預早用清水浸六、七個鐘至軟。

2、香菇少少切粒用油預先爆出香味。

3、豬肉剁碎，用「薑蓉 、酒、生粉、糖、生抽」略略醃過少少味道，無需太咸，因為遲下總要落味道煮過。

上述三款材料，全部拌勻，即成釀餡。

糯米嘅份量我就控制在大約豬肉嘅三分一左右，加佐糯米，唔會凈係肉咁肥膩，咁樣即可食到糯米嘅軟糯，亦可嘗到肉嘅鮮味，係非常之好的配搭。

餡整好後，開始處理苦瓜。

苦瓜打圈切成適當的厚度，個人鐘意幾厚就幾厚，無問題嘅。

切好圈的苦瓜，出一出水，可以減少苦瓜的苦澀味。

出過水的苦瓜，攤凍後，將配好味道的餡，釀和苦瓜圈內即可。

好簡單，將個苦瓜擺係手，將餡料塞入圈內，手掌可以頂住餡料唔會從圈嘅另一邊走出嚟。

釀好的苦瓜，落鑊稍稍煎至兩面金黃一型，等佢唔會散開。

落幾片薑同蒜頭一齊爆香。

最後落水，落豉油，糖，燒酒，燜煮大約十鐘至熟透。

燜好後，唔揭蓋焗多十分鐘，咁苦瓜就好像隔餐再煮過一樣又入味又淋軟。

有凈太多醬汁的話，可以埋個芡收汁再淋係餸面。

好好餸飯，而且最緊要加佐糯米嘅餡料，食落一啲都唔會流，而且總增加少少糯米特有的香味，超鐘意~~~

好值得推薦俾好苦瓜同糯米嘅朋友，一定要嘗試整返次，一定唔會失望。

夏日炎炎，簡單就好，開飯~~