知足

腐竹又叫支竹，係廣東人嘅叫法，因支竹音同「知足」，古語有話「禍莫大於不知足」，因此逢年過節需要以支竹入饌，係提醒後人需謹記知足一事，先可以得以常樂也~~

我明明好鐘意支竹果種淡淡的豆香味，加埋軟而不腍，彈而帶韌嘅獨特口感，但不知為何，近年好少好少整嚟食咧？

我都唔記得佐~~

唔敢買內地摻佐塑膠粉，或者甲醛超標的黑心腐竹，所以意識上，好耐好耐都唔敢再食腐竹。

前日經過某檔本地出產的前舖後廠嘅腐竹舖，即刻提醒返自己腐竹有幾美味，買佐斤返嚟，以慰胃念。

從來唔敢買出邊一包包浸好佐嘅所謂新鮮腐竹，點知係用佐咩水去浸㗎，浸佐幾耐啊，所以都係買乾嘅腐竹，自己用滾水浸幾下，好易就浸開佐㗎啦~~

區區兩條腐竹，浸發後，已大大一碗~~

嚟個腐竹雜炒，有乜炒乜。

「腐竹、洋蔥、甘筍、蒜、雞扒」等材料。

雞扒用佐「豉油、糖、薑蓉、生粉、米酒」略略醃過。

先炒一炒香洋蔥甘筍蒜等物，裝起另外置碟。

然後原鑊倒入雞肉炒至轉色，最後倒入所有材料，落少少水，加少少麵豉醬，一細匙老干媽豆豉醬，燜至熟透即可。

依味餸嘅靈魂人物，係帶著濃濃醬香味配以淡淡豆香味的「腐竹」~~

熱天嘅葉菜來去不過係通菜莧菜咁㗎啦。

尋晚烚熟一碟莧菜，淋上香噴噴自製腐乳醬，嫩一嫩的莧菜，好味到不得了~~

咁樣一個晚餐，知足，知足也~~