暖笠笠之糖烤栗子、咖喱雞、蕃茄湯

天寒地凍時，個人都好懶得整乜0野食，咁就求鬼其其，整一煲咖喱雞，同相公一人一個碟頭飯。

好普通的材料，雞亦，洋蔥，薯仔，甘筍。

做法以前寫過，就唔重複啦。。。

一個一碟飯，電視撈汁，好好味。。。。

好簡單地，滾佐一個蕃茄蛋湯，酸味味，幾時都係咁鐘意~~

睇下，一人一碟飯，加埋一啖湯，簡單得黎，好滿足啦。。。

家下出邊買野乜都貴，就算價格無變，個量都絕對少得驚人。

舊年十蚊一包栗子，已經夠我食到好滿足，今年同樣十蚊包栗子，未試真個味，已經食晒，真係無癮。

係街市買桂林尖頭栗子，都係十五蚊二磅咋。。。。

買佐二磅返黎，大半愛黎蒸，乜都唔使落，洗乾淨之后，隔水蒸大約二十分鐘度。

咁樣個栗子較甜，而且因為無開口，不易入菌，可以擺幾日慢慢食。

 

另外細半，我就愛黎整「糖焗栗子」啦~~

首先，個栗子洗凈之後，係個頭頂度斬開一刀，等佢有一個口。

咁準備一碗暖水，落多少少糖，開成一碗糖水，然后將栗子浸入糖水度，浸大約二個鐘或以上。唔好太耐啊，我都係浸佐二個鐘。

浸佐甜味的栗子，入焗爐，二百度火，焗二十分鐘，焗緊既時候，較定一個蜜糖水，用一湯匙蜜糖，一湯匙水，一湯匙油，開成一碗仔蜜糖水備用。

最后，將焗佐二十分鐘的栗子取出，用軟刷掃勻一次蜜糖水上栗子，再擺入去，繼續焗多二十分鐘，前后一共焗四十分鐘，咁就OK啦~~

睇下，油油靚靚，食起上黎，香香粉粉，甜蜜蜜的「糖焗栗子」，就咁產生了。。。

個味同出邊買緊果D，當然有過之而無不及啦~~~

最緊要，自家制，乾淨又實惠！

焗好既栗子，好易就剝晒成個殼出黎，夜晚當零食，暖笠笠，香噴噴，無得頂啊~~~