小菲菲俠自煮樂: 書房大變身

25 3月, 2014

書房大變身

突然有一日訓醒，見到阿仔對腳，就將頂住張BB床，覺得將書房改造成信丞仔間房要儘早進行，即刻搖醒強哥，大致講佐我心目中阿仔間房的構圖。

強哥真係好好野，晨咁早起身，度呎吋，返到公司，畫好圖，夜晚收工返來俾我睇圖確實最後方案，確認OK無問題，第二日將圖俾廠，一個星期之後廠話已整好，擺係廠一個星期等氣味散走之後，安排貨運公司送貨~~

一切如此地簡單~~

睇下，改造前書房的凌亂與無章~~~

原本安排佐師傅第二日上門安裝，但係當晚收工返來的強哥，覺得親力親為整好自己仔間房的意義似乎更有意思。

於是同強哥，夾手夾腳，一齊砌模型咁，砌好間房~~~

為佐盡用所有地方，窗檯位都利用埋連起整個地檯，再加上可以抬起的活動式書檯，座係窗邊睇書上網，定必係樂事一件~~

有啲位要現場先做處理，強哥不是專業木工，但都小心地處理好每一個細節，雖不是最完美，但已做得最好~~

依一剎那，覺得強哥，真強！

一間屋的儲物空間係間房整潔齊整的重要因素，依家成個地臺俾我擺雜物，真係超開心~~~

香港屋企細係不變的事實，所以盡用其位係絕對有必要，依家多佐小朋友活動的空間，又足夠滿足家居的一切條件，對於依次的書房變身，好滿意！

我同強哥話，其實屋企小小的改變，已經可以令到環境有好大的變化，心境亦都同時變得美好許多，最緊要其實處理的過程不是太複雜，我建議佢公司，不要凈係做舖頭同對公的裝修，多做屋苑依類的裝修，多一個生意的選擇，未必係壞事。