韭菜生煎包、韭菜盒子

我其實超鐘意食韭菜，所以某日假期一覺瞓醒，覺得超想食韭菜煎包。

晨咁早將大丞交俾強哥，即刻走落街，買佐半斤細韭菜返嚟，整生煎包。

自己識整有依樣好，隨時想食唔係懶，就幾時都有得食。

生煎包嘅做法可以參考以前寫過嘅作法：「http://blog.yahoo.com/_TYO2LOZIMZEMASBBQ6KC3UYDUA/articles/14730」

講下個餡：

韭菜切粒、免治豬肉簡單用豉油糖醃入味、少少雞蛋炒香後剁碎，加少少五香粉，少少鹽，淋少少熟油入去，搞掂個餡。

因為我細細個食過一間生煎韭菜包，就係有五香粉嘅味道，所以自己又加佐少少五香粉，更接近細個食過嘅味道。

兩邊都煎至香脆，自己食，樣唔緊要，好味至係真理

超掂，勁似細個時嘅果種味道，爆開心。

韭菜買多佐，咁煎包嘅時候，又搓多少少麵粉，整韭菜盒子。
韭菜盒子煎嘅時間較短，所以餡料全熟。

「韭菜剁碎，蛋煎好剁碎，想味道再豐富啲，咁就再用少少油，爆香些少蝦乾粒，再撈入餡料度，俾少少鹽撈勻，搞掂個餡」。
因為韭菜會出水，所以通常我會整好個麵皮再撈餡，一撈好餡就包，一包就即煎。

韭菜盒子嘅皮，用「燙麵」法制成


作法好簡單，唔洗落酵母，取麵粉適量，擺幾粒幼鹽撈勻，衝入滾水，用筷子攪勻麵粉，稍涼之後，用手搓成麵團，擺室溫下十至二十分鐘，醒一醒麵團，咁就用得啦。

用滾水搓成嘅麵團，稱為「燙麵」，因為含水量大，加入滾水後麵身較為軟熟，最適宜用嚟煎或者蒸，制成口感較為軟熟唔會太乾太硬。

整豆沙餅或者鍋貼嘅皮都可以用燙麵整。

少少幾湯匙嘅麵粉，已經整到一細舊麵團，本嚟想一開二，都係太大，後來一開四，搓到麵皮薄身啲，煎好後食上嚟軟啲好味啲。
韭菜盒子真係好易整㗎，搓成一大塊圓餅，舖入餡料，對折捏實，搞掂。

餡料唔好落得太多，要留多些少空間，煎嘅時候會有空氣入，太多餡會爆汁。

一分鐘整一個。

平底鑊落少少少少油，擺入去兩邊各煎分半鐘，中火，要COM蓋。

因為搓得麵皮好薄，所以無需驚唔熟，麵皮含水量較多，唔洗驚太乾。

三分鐘，煎好。（韭菜本身烘一烘熱就食得，其它餡料熟嘅，所以唔洗煎太耐`）

鑊熱先好擺餅入去。

以前未識整，去食北方餸一定點韭菜盒子食，依家學識佐，都好耐無係出邊叫過依個麵點羅。

自認整得比之餐廳，有過之而無不及，即整即食，咬落有麵粉本身嘅香味，餡料趁熱咬落，有汁㗎~~~、

好滿意。

同煎包對比下，韭菜盒子好大一個㗎~~~

煎包係發酵過嘅麵身，韭菜盒子就死麵，便只要運用唔同嘅搓皮法，兩者整出嚟雖然口感各有不同，但各自一樣咁精彩。

全程由整到食，都係一個鐘鬆啲，無人吵， 自己一個人享受全程嘅製作，好滿足。

講起慚愧，我係直到近依兩日先開始獨自幫大丞衝佐幾次涼，以前一路都係同強哥一齊合作完成，依家丞識得自己座得好穩陣，先敢放膽自己幫佢洗白白。

抹乾淨身後，由得佢自己浸下水，等血液循環好啲。





總好識保護自己㗎，捉到實一實，一有少少滑，自己用腳頂返座返直，叻仔~~

好好享受下喇~~