家庭自製乳酪（無需乳酪機）

我好鐘意食乳酪，台灣叫「優格」，內地叫酸奶，各有其名，其實都係同一樣嘢。

食乳酪嘅好處自己上網搵下，資料大把，我就唔多講喇，我就鐘意佢嘅味道同口感，其它好處咁又唔多計較。

只要滿足到簡單地幾個物理條件，其實家庭自製乳酪，真係話咁易。


1、首先，準備一杯市售乳酪做「菌種」

最好搵原味嚟整，咩牌子不計，要嘅係其中嘅「乳酸菌」。




2、鮮奶適量，加熱至40度左右。無溫度計嘅，可以手觸感，大約略溫暖，比人體溫度稍高少少，就足夠。


太熱又唔得喎，會殺死啲菌，太凍又唔得喎，會培養唔到啲菌，最佳溫度，就係比人體稍暖少少就好。

最好用全脂奶嚟整，口感上會滑好多。

鐘意甜嘅，可以落少少糖攪勻，乳酸菌好鐘意甜甜啲嘅嘢，有少少糖，會生長得快啲。

3、將市售嘅乳酪倒少少至杯度，做「菌種」。

我用佐阿仔多餘嘅奶樽嚟整，貪佢可以直接擺入消毒機度高溫殺一殺無用嘅菌。

因為自製乳酪就係培養細菌嘅一個過程，適合地溫度可以有助細菌嘅生長，如果唔洗乾淨製作嘅容器，容乜易易養到乳酸菌嘅同時，養埋其它不知嘅菌出嚟，就唔好喇。

如果屋企環境無咁方便，用其它嘅杯啊碗啊嚟整，用滾水煮一煮殺菌，其實都一樣無問題。

4、然後將加暖佐嘅鮮奶，倒入樽度，攪一攪勻。

5、搵一個寬口嘅保暖壺，入少少暖水（又係四十度左右就好）

6、將步驟4嘅樽，擺入裝佐暖水嘅保暖壺度，扭實蓋，就咁焗八九個小時，搞掂。

中間可以隨時揭蓋，如果水凍佐，可以再添啲暖水入去，只要溫度保持四十度左右就OK。

我就焗佐八個鐘，拎出嚟望下，凝固佐啦啲奶~~~

總聞到好香好原嘅乳酪味~~~

我講嘅步驟好似好多，其實全程製作，唔計焗嘅時間，都只係用佐五分鐘唔到咋，係咪超方便，超簡單咧~~~

整好嘅乳酪會有少少清水狀（乳清）滲出，係正常嘅，唔洗擔心。

其實只要滿足到「菌種、全脂奶、適當嘅溫度、能夠保持溫度嘅物件」依幾個條件，整乳酪，真係好簡單。

我有一個暖水壺細細個，保暖又好，我將溝佐菌種嘅鮮奶加熱到四十度後，直接倒入暖水壺入邊焗七八個鐘，搞掂，總方便，要用嘅工具又少，一樣無問題。


菌種嘅多寡無乜所謂，同發酵麵團嘅道理一樣，落嘅菌越多，溫度適當又足夠暖，發酵所需嘅時間就越短，但係又要記得喎，發酵過度，會過酸喎，溫度過高，又會殺死菌而導致發酵失敗喎，所以任何事，過猶不及，只要恰到好處，就完美收場。


發酵八個鐘，兩大湯匙嘅菌種，整出嚟嘅乳酪，恰到好處，酸酸甜甜，真好味~~~~

唔想馬上食嘅，焗夠八個鐘之後拎出嚟，擺入雪櫃，二三日之內食完佢都無問題。


鐘意原味嘅，就咁直接食，又滑又香。


依個整好嘅原味乳酪，可以留起二三湯匙，留返下次再整，佢就係菌種喇。

又或者加啲果占入去，香啲，甜啲~~~

攪一攪過嘅乳酪，好滑creamy，絕對值得一試~~~

咁啲菌種點保存？可以分好一份份，一次需要落嘅份量，擺入冰格度，可以保存二三個月慢慢用。


用嘅時候，提早拎出嚟解凍，然後就當一般菌種咁使用，就OK喇。

自家制嘅乳酪，平靚正，絕對無添加物，食得天然又健康~~~