兩餸

屋企好多韓國調味料，要清一清佢。

整個韓國拌飯喇。

配料悉隨尊便。

我用佐一個煎蛋，少少魚腐大豆芽，泡菜，炒好嘅肉碎，拌飯醬，麻油，係咁多。

撈一撈，食得。

好開胃~~~

信丞出世至今，兩年喇，兩年我未試過有一日可以訓超過八點鐘咖，好慘啊。

依個小朋友日日早睡早起，好事嘅。

我太過托大，只係幫亞仔報佐四間幼稚園嘅K1，龍年效應，原來間間都超多人報名。亞仔又係細B，連說話都未識講，面試時唯有靠個笑容去打救，諗住如果無學校收，就遲多一年先讀書，又估唔到見得成兩間，總要係上午班，個心都定啲。出年九月要返學喇，到時我都可以輕鬆少少瓜~~~

平時都係下午等小朋友瞓佐晏覺，我就做家務搞清潔，啲餸菜先洗好切好，可以預先整定嘅就先整好一部份，咁小朋友瞓醒，我就可以陪佢玩，等晚上爸爸收工返嚟我先入廚房煮餸，煮其實好快。

節瓜豆卜煮肉碎

                                    蕃茄煮魚

兩味餸都係小朋友可以食得嘅。本身我屋企一向都唔會食得太鹹，依家要配合小朋友飲食，都儘量清淡啲。就算濃味，都係靠食物本身的配搭去完成，咁樣等小朋友唔會食得太重口味。

如果當日嘅餸菜太濃味，都會另外煮一味清淡啲嘅俾小朋友，我儘量係佢五歲之前，都食得清淡簡單啲。