自製滑滑豆腐花

晏畫老公返嚟食飯，一碗仔甜品擺係檯面，老公一揭開個蓋睇「嘩，老婆你整佐豆腐花啊」

跟住再望住晾係度，剛剛洗凈總飄住柔順劑香味嘅幾趟窗簾，一臉不解「老婆你點可以係短短幾個鐘整咁多嘢㗎」

好多人誤解，唔駛返工嘅師奶一定係好得閒，一日不過煮果一二餐飯，有幾難。

無人知道，屋企嘅床單被單，沙發套至衫褲，點解可以時時保持清潔狀態？

油鹽醬醋鹽，牛奶果汁，牙膏衝涼液，紙巾廁紙，永遠似乎屋企未斷過。

依地全部都唔會無端端變出嚟，需要家中細心嘅師奶去不斷補充與更新，好似小螞蟻咁，一日搬D一日搬D。。。

唯有咁，一個家庭先至可以保證一定嘅生活質素去令到辛苦工作佐一日嘅男人返到屋企感受到家庭嘅溫暖，依地如果無愛嘅存在，係無可能令到一個師奶可以年復一年咁堅持落去。

----------------------------------------------------------

又跑題~~

講返豆腐花，尋晚浸落黃豆，今日整豆漿飲。

咁整得豆漿，順便再整埋豆腐花出嚟，都係好順手嘅工夫姐~

係二德惠買佐一包仔食用石膏粉。

我無好精確咁去度過比例。

大概地講下個份量：

一個碗仔嘅量：一粒黃豆咁大粒嘅石膏粉+二粒綠豆大嘅粟粉+三粒黃豆大嘅凍滾水溝埋攪勻，擺係碗底。

 

然後將煮好嘅豆漿，衝落碗度，擺住五分鐘或以上，即成~~

係好簡單㗎。。。。

只要有材料。。。。

 

落少少糖~~

 

我多數都係咁嘅份量，整出嚟嘅豆腐花，係好滑好滑，而且用嘅係有機黃豆，唔係轉基因果D，整出嚟嘅豆漿或者豆腐花，都有好濃好香嘅豆味~~

 

 

雪佐佢再食，總好味`~~