係街市買餸，無論係價格或者選擇，都優勝於超市。
早幾日係街市，本嚟已經買佐當晚要煮嘅材料，行經一個菜檔，見到檔主正在切南瓜，好似好靚咁，而且一開四，一舊都唔會太大舊，即刻整舊返嚟，一磅，四份一嘅南瓜，都係二個半銀子咋。。。
本嚟係要炒豆角，不過豆角可以留，南瓜切開佐，我驚擺得耐會有菌係表面滋生，所以就先煮佐依味南瓜。
南瓜愛嚟炒，同蒜蓉嘅味係最格，其實乜材料都唔使，凈係南瓜同蒜蓉一起加水燜，落少少鹽，已經可以好美味。
不過我屋企總有少少肉醬，咁就加埋一起煮，會香D。
再落多少少蔥，增加香味。
煮法：1，先落油爆香蒜蓉。
2，然後倒入南瓜，加水，落肉醬，開中火燜。（無肉醬可以唔落，落少少面豉，或者落免治豬肉，增加鮮甜味）
3，燜嘅時候完全唔使去鬱佢，因為南瓜一熟佐好易變爛，咁由得水去慢慢煮佢，我會轉入煲仔度繼續煮，咁就水一滾，落多一扎蔥段落去，撈勻，趁南瓜未熟透，轉入瓦煲仔，開火繼續焗多十分鐘，食得~
因為係瓦煲焗熟，好入味之餘，南瓜保持得一舊舊嘅樣，實際已經好腍好香㗎啦，而且南瓜本身嘅清甜，加埋少少面豉嘅醬香，加埋蒜蓉與蔥嘅味道，好香甜惹味。。。
我無落到鹽，凈係用佐面豉入邊嘅咸味，所以依餐我都無乜食飯，就凈食佐好多南瓜。。。。
依個南瓜煲，唔計肉醬，最多都係三蚊雞`~
係街市豆腐檔買佐舊豆腐，唔係大陸運過嚟加佐防腐劑果D，而係本港自家新鮮制㗎，豆味好香，一大舊都係三蚊雞。
本嚟係想整「小蔥拌豆腐」，不過睇到屋企凈有少少梅菜，即刻又轉軚，整一個易整又惹味嘅「梅菜蒸豆腐」
材料：豆腐一磚，梅菜少少，蒜蓉少少
做法：1，先將梅菜用蒜蓉爆香，落老抽少少，蠔油，麻油調味。
2，將豆腐撕碎，我就係直接用手撕，如果用刀切會靚D，不過會有刀嘅鐵味，所以我寧可醜樣D，用手去撕爛豆腐，食起上嚟會香D。
3，將步驟1炒香嘅蒜菜，舖係豆腐上邊，上鑊猛火蒸五分鐘，搞掂~~
食嘅時候，撈勻佢再食，集清爽惹味於一身，梅菜惹味香口，伴以軟綿綿清淡豆香嘅豆腐，一流！！~
依碟餸，計埋蒜蓉梅菜，至多係四蚊雞！
加埋隔夜湯一煲，一個晚餐，搞掂~~
唔計湯水，依餐加埋，絕對十蚊有找~~
沒有留言:
張貼留言