兩餸一湯---蒜苗炒牛肉、肉碎炒紹菜、昆佈味噌湯

今日早上八號風球未落，老公多佐半日時間，可以訓多陣。

我慣佐早起身，八點幾鐘就醒佐訓唔著。

咁就整份早餐俾自己食。

用佐奇妙醬做底，面就擺佐煙肉洋蔥粟米同大量芝士。

衝杯大大杯咖啡，醒神~~

 

過一陣老公都起佐身，佢話想落樓飲茶，我話今日茶樓實多人到閉，咁辛苦逼餐飽，不如碌個面仔俾佢總好。佢睇到我食焗厚多士，又話要食一塊，咁又整佐塊俾佢。

食食下，突然諗到乜，去疊信件度搵佐份嘢出嚟，指住其中幅圖問我：「老婆，似唔似你整㗎~」

咦，又真係幾似啵~~

老公講笑咁話「你估會唔會係佢哋睇到你整過依樣嘢，所以又加返入餐單㗎」

老公，你真係太睇得起你老婆la~~

不過如果要我用28蚊去食咁樣份下午茶餐，真係不如自己整總乾淨快脆啦。。。

做法有興趣可參考我以前個網誌：厚切多士

 

-------------------------------------------------------------------

尋日斷斷續續落佐一日雨，都無出街買餸，雪櫃有乜就煮乜。

知道老公尋日晏畫都係食佐少少嘢，加埋落佐一日雨，個人肯定好快肚餓，電視話六點會掛八號風球，所以老公實會提早返嚟，估都估到佢一返到屋企肯定第一句話係「好肚餓好肚餓啊老婆」

所以尋日提早煮飯，五點鐘就開始煲飯。

見天涼涼哋，想滾個湯水，等佢有啖暖暖湯水落肚，個胃都舒服哋。

雪櫃無乜滾湯材料，好彩有包即食嘅昆佈。

用水浸幾下就發起~~

 

咁就簡單地用昆佈，味噌醬一包仔，幾粒奶奶俾嘅手打墨魚丸，滾一個湯水。

 

有啖湯水暖暖個肚仔，舒服好多~~

係超市買佐條紹菜，擺係雪櫃都半個月羅，尋日羅出嚟切開，竟然完全無事，浸浸下水全部番生。。。。

紹菜真係好嘢，擺得咁耐都無事，以後要擺定一條係雪櫃，出唔到街，都可以有碟菜食嘛~~

用蒜蓉同肉醬炒埋一碟，清甜好味~~

 

雪櫃凈有半條牛展，切片同幾條仔蒜苗炒做一碟。。。

惹味~~

 

果不其然，老公五點幾未到六點鐘一返到屋企，已經係度叫肚餓了。

飯煲好啦，餸菜亦都煮好，總等咩啊，開飯喇~~~