依幾日都係連續落雨㗎啦，尋日無出街市，係樓下惠康買佐D生果同菜。買慣街市嘅價，係超市買餸真係覺得超貴。
買佐包蘋果同一盒蕃茄。
滾一個簡單嘅湯水飲。
用佐二個蘋果，一個蕃茄。
上次買佐元朗種嘅有機蕃茄，係自然熟透，茄味濃郁，色澤紅潤，而且一煮好快起沙咁散開，唔似得依地蕃茄，係個面噴過藥，雖然睇落紅潤，其實係好生嘅時候就催熟佢，睇落紅潤，其實未夠熟㗎，所以點煮都係好硬。得個酸味，蕃茄味好淡。不過無得選擇之下，都唯有佢可以頂上。
所以通常我煮餸用得著蕃茄，必定要去佐皮再用。
蘋果去皮切片之后，浸一浸鹽水，咁擺幾耐都唔會因為氧化而起銹。
平日如果我提早切定蘋果，都會過一過鹽水再擺入雪櫃，夜晚飯後再食，都依然可以保持得好靚，而且帶有一層淡淡咸味，同蘋果嘅清香爽甜，相得益彰，食起別有風味~~
滾湯除佐蘋果同蕃茄，再加埋少少免治豬肉，咁啖湯會甜好多。
通常免治豬肉我都會買多少少擺住，一次用少少，志在令到碟餸或湯水會更鮮甜哋，咁一次買多佐嘅肉碎，我就會用一個細細個嘅保鮮袋，分裝成每次會用嘅量，然後壓到扁一扁，再擺入雪櫃。
壓扁嘅目的係令到解凍嘅時候，因為面積大而扁，咁就可以減短解凍嘅時間。
同埋，如果好似下圖咁，用二個不銹鋼碟夾住D雪佐嘅肉，上邊再加少少重嘢，咁解凍嘅速度，又會再快D㗎。
通常一細袋仔肉碎，解凍需時都係五分鐘左右就搞掂。
解凍時間快，咁就可以減少細菌係室溫中在肉里邊滋長嘅速度，多少都會好D㗎。
依款滾湯嘅煮法：
1，先落少少油係瓦煲度，倒入切成粒粒嘅蕃茄炒到蕃茄轉熟散開。
2，加水，加一粒雞精，落曬啲蘋果。
3，免治豬肉醃一醃味，加入湯水度，開中火滾半個鐘度即成。
蕃茄天然嘅淡淡酸味，加埋蘋果嘅清甜，一煲好啖湯，我忍唔住先飲佐一碗先啦。。。
勁開胃，勁好味。。。。
值得推薦大家滾依款湯水！~~
酸酸甜甜嘅湯水，維生素又豐富，小朋友實會鐘意㗎。。。所以如果屋企有小朋友，就要嘗試下啦。。。
因為我用嘅係細煲仔，凈係煲一細煲，所以就二個蘋果一個蕃茄，如果煲得多，材料要相應增加。
炒碟餸，碟餸貴羅。
用佐二條榮X嘅臘腸，二條都二十幾蚊，超市買佐扎韭菜花，九蚊。
韭菜花頭先我係街市又買佐扎，都係三蚊雞咋嘛，超市買菜真係貴得離譜。
碟餸三十幾蚊，真係覺得好貴。
又好鐘意食臘腸，但係又唔敢亂買，驚唔知乜肉整，有無人好介紹邊度有又平又正嘅臘腸買咧？
一個湯一碟餸，搞掂~
沒有留言:
張貼留言