依排食得熱氣嘢多，所以煲個清熱潤肺嘅湯水俾屋企人飲。
羅漢果菜乾湯就係首先了。
因為菜乾同羅漢果屋企都有貨係度，只需要買份骨頭返嚟就煲得。
依隻菜乾唔係街買，係一個親戚自己親手制㗎。
唔係普通常見嘅白菜曬成嘅菜乾，而係用芥菜，先洗凈，再上火蒸熟，然後贊一層酒，先至係太陽底下曬乾。
咁樣整出嚟嘅菜乾，清火效果更勝一籌之餘，自家製作，保證清潔衛生，因為製作繁複，基本上到佐依家，都無乜人會咁做出嚟賣啦，想食，唯有自家整啦。
睇下，依隻菜乾，係好長身㗎。。。。
依款湯水所有材料係：
豬尾骨一盒，菜乾，霸王花乾適量，甘筍適量，南北杏一碗仔，羅漢果半個。
因為屋企凈有好多霸王花，咁就加埋落去一起煲啦，係可以唔使落㗎，而羅漢果本身具有好強嘅清熱潤肺效果，不過好多人未必接受果种甘味，如果唔鐘意，可以將羅漢果轉為蜜棗，隻不過依款湯嘅藥效，就必定大打折扣。
所有材料加水煲二個鐘或以上即成~~
有好清香好清香嘅菜乾味，加埋羅漢果嘅甘味，依款湯水，落少少少少鹽就足夠味道啦~~
炒多兩個小菜，我好鐘意食韭菜㗎，而且韭菜本身對人身體嘅腎臟有極好嘅滋補作用，係最天然最顯效嘅一種食材之一，古代醫書上有寫過一款「羊肉韭菜粥」，係絕佳嘅滋補腎臟嘅一個食療方法，不過到佐現代，好多古方已經失傳佐。
並且韭菜本身具有極高嘅纖維素，對於促進腸道蠕動有極好嘅效果，有醫學報道指出，常食韭菜，可以有效預防大腸癌㗎~~
韭菜雖然係好，只不過嚟到現代，農夫為佐提高產量同質量，好多時都會係韭菜上噴農藥以防蟲咬韭菜，而韭菜嘅收割期好快，所以未等得及農藥得到適當嘅揮發可能已經擺上菜架，經常可以驗到韭菜入邊嘅農藥含量大量超標，所以有學者指出，現代人食韭菜，等同服毒。
唔知香港所售嘅韭菜農藥含量如何，不過無論有無，自己返到屋企，都可以做一個簡單地稀釋衝淡菜入邊農藥嘅動作，就係用「鹽水浸」
不過我睇到好多人，係識得浸鹽水，不過一浸，可能浸成個鐘夠耐，可能會覺得，浸得越耐就越能夠將農藥溝淡。
其實咁樣做，真係大錯特錯，因為菜只需要係鹽水度浸十五分鐘左右已經夠衝淡農藥嘅含量，如果浸泡超過十五分鐘之後，菜入邊嘅農藥稀釋佐入水度，再浸耐D，咁農藥，就又再深入地滲入佐菜本身，咁樣做，反而加重佐農藥嘅攝入。
最正確嘅作法，應該係將菜先衝洗一次，然後浸入鹽水十五分鐘，跟住倒去鹽水，乾淨地衝洗二遍，咁樣就可以最有效地衝洗去菜表面嘅殘存農藥啦。
一款美味有益嘅「韭菜炒蛋」
簡單又平價~~
另外，買佐一條紹菜，用少少煙肉，加蒜頭炒。
清甜惹味~~
一個晚餐就搞掂`~~
廚房小智慧分享：
另外，講下廚房我用緊嘅果隻洗手液，鐘意用一擠出嚟就係泡泡嘅洗手液，貪佢好方便，咁上次買佐一個簡易包裝嘅「洗手液補充裝」，買返嚟先至發覺到原嚟唔係「泡泡洗手液」嘅補充裝，屋企全部都係泡泡裝嘅洗手液，咁依隻普通洗手液，無用啦。。。掉佐好浪費㗎，咁我發覺，其實泡泡洗手液同普通洗液嘅區別，就係泡泡嘅會稀好多，好似水咁可以流動，於是我就將普通果隻洗手液溝蒸餾水開稀佢，再倒入泡泡洗手液嘅吉樽度，一試，哈，掂啊。。。
我無做過比例，總之試下，逐D溝水，最好用蒸餾水去溝，無咁多菌，哈，咁樣講法，其實泡泡洗手液，可以用任何嘅衝涼液去製作都可以啦。。。
另外，如果係廚房用嘅洗手液，可以加少少醋入去，因為搞完家務，用少少醋洗洗手，可以有效減少「主婦手」嘅產生。
沒有留言:
張貼留言