美味自家餸---秘制洋蔥豬扒、咸蛋芥菜湯

前一日整鍋包肉凈有少少肉，咁將佢切片之後剁鬆。

整一味秘制洋蔥炒豬扒

係早輪係份免費報紙上睇到一個台灣媽媽嘅秘制食譜。一睇到「秘制」二字已經心痕想試整啦。

睇過醃料，都覺得味道應該幾好。

介紹下醃料：

生抽、老抽、砂糖、胡椒粉、雞粉、薑汁、豆豉剁碎、蒜蓉、生粉、

水幾湯匙

（我費事剁豆豉，係直接用李X記嘅豆豉醬同一匙蒜蓉）

然後將已拍鬆佐嘅豬扒肉同醬汁撈勻，最後再落多一湯匙生油。

醃十五分鐘左右。

食譜嘅原做法係直接用油炸熟，就咁食肉。

但係我肉嘅量比較少，而且唔想再食咁多炸嘢，所以改一改動，加洋蔥入去，改炸變煎。

做法：1，先將洋蔥落鑊炒出香味，落少少老抽同糖，將洋蔥炒好味道，鏟起另置備用。

2，鑊落少少油，將醃好味嘅豬扒倒入去，慢火煎熟，最後倒入洋蔥兜一兜勻味即可裝碟~~

咁就變成一味洋蔥煎豬扒。

（洋蔥建議買紫色洋蔥，肉會厚身同埋甜D㗎）

咁樣材料醃出嚟嘅味道，真係好豐富好惹味。。。。

好值得推薦大家試下~~

買佐一斤芥菜，凈係用佐一半，加一個咸蛋，滾一個清清哋嘅芥菜湯。

做法：凍水落薑，煲滾水之後落芥菜，水滾之後倒入咸蛋，煮至無腥味即可~

一款完全無油，好甘香嘅清湯。。。。

咸蛋本身已有咸味，想飲清淡D嘅湯，所以無另外落鹽。

凍水落薑咁啖湯飲起無咁燥熱，如果熱水落薑煲湯水，薑會令到啖湯變得燥熱㗎。。。

 

有肉有菜有啖湯~~

 

切佐半條臘腸粒粒同飯一起煲，甘味~！

因為我食飯都係幾啖就夠，所以平日煲飯，二個人，一杯米咋。。。。