係街市最經常聽到嘅莫過於一眾師奶無可奈何嘅聲音「轉嚟轉去都唔知買乜嘢嚟煮好」
似乎依個問題極少係我身上發生過，因為我有一個絕不挑食的「服務對像」，我煮乜佢就食乜，除佐係蝦蟹依類過敏源佢唔可以食，基本上，佢係對於食物無任何要求。
所以基本上係我「想煮乜」都無問題，成個廚房由得我去玩。
今日行經街市嘅魚檔，見到一檔擺出嚟嘅魚腩，附帶的魚腮總識得鬱下鬱下，鬼咁新鮮，去街市之前係打算買蓮藕煲湯再炒個菜咁樣㗎，咁行佐一圈都買唔到靚嘅蓮藕，計劃有變，好似對魚又有興趣，即刻買佐一塊魚腩返嚟，再買多份炸豆腐，攪多十蚊瘦肉，搞掂返屋企~~
做法：
1，將魚腩清潔之後斬件，用少少古月粉醃一醃入味。
2，懶得炸豆腐，直接買佐份炸好嘅豆腐，用滾水衝一衝走表面多餘嘅油同塵，切片待用。
3，將醃好味嘅魚，逐件撲上生粉，我好鐘意食炸過之後再燜嘅魚腩表面嘅果層脆粉，好入味，所以專登撲得厚身DD粉。
4，跟住用少少油，炸至表面金黃色。。。。
炸過魚嘅油好臭，通常我都唔會再要，所以炸嘅時候落少D油，無咁浪費，我炸嘢多會用一個細身嘅煲嚟炸，咁落油唔駛咁多。
睇下全部材料圖：
炸好嘅魚腩，豆腐切片，薑切絲，蔥切段
5，然後熱鑊落少少油爆香薑蔥，（蔥唔使一次落完，留起少少最後再落），再落豆腐，炒一炒香。
6，加水，加魚腩，加蠔油，想鮮味D，可以再落多一匙仔糖，加少少韓國大醬增加豉香味，落少少酒，落少少古月粉，開火燜至即將收汁之前再轉過瓦煲仔，落凈低果D蔥段，開返火焗一焗佢~~
蔥最後再落一部份嘅目的係會更加突出蔥嘅清新香味~~
因為魚係用生粉炸，所以好易好快吸曬水，要小心睇火。
一味濃濃醬香，又帶有魚嘅鮮味，同豆腐配合得天衣無縫~~
極好送飯嘅一個薑蔥魚腩豆腐煲`~
滾多一個粟米魚肚羹湯~~
做法太簡單，就唔多講啦~
一餸一湯一晚餐~~
好彩平日我都會剝定幾條粟米粒粒擺入雪櫃，隨時煮面滾湯，都可以有得粟米用。
咁樣一個湯水愛嚟撈飯，好好味~~
沒有留言:
張貼留言