食雞

突然好想食好味既白切雞。

所謂好味，係雞既肉質夠實夠滑，雞味濃郁，最緊要係夠新鮮。

咁冰鮮雞係好難符合我對雞既要求。

唯有走去街市買佐隻好貴既走地雞。

值得幸慶既係，貴少少都叫做可以食到新鮮雞，再過多幾年，恐怕要走去香港以外既地方，先至可以品嚐到新鮮好味既雞雞羅。

我整白切雞好簡單，用幼鹽，將洗凈既雞，內外均勻地抹勻一層，然后醃二十分鐘度，隻雞大約三斤重，我就蒸佐二十分鐘。

無落薑、五香八角、其它乜乜調味，凈係少少鹽去醃，蒸二十分鐘，咁樣整出黎既雞先至唔會被其它調味掩去佢既鮮甜味道，而蒸既時間剛剛好將雞蒸熟，又唔會過老，又有少少咸味，就咁凈食唔沾醬料，都可以好好味。。。。

 

 

另外用豆卜芽菜肉鬆炒佐一碟。。。。

 

 

整佐一碗仔醬汁去點雞肉，用「蒜蓉、薑蓉、蔥、豉油、麻油、少少檸檬汁、少少砂糖」，咁樣既醬汁係好香好開胃架。。。

無食飯，趁新鮮食多D雞肉，依晚食佐好多肉，勁有罪惡感。。。。

但係，真係好好味。。。。

 

 

------------------------------------------------------------

 

第二日，買佐幾蚊瘦肉剁碎，蒸佐一個咸魚蒸肉餅。

 

 

蒸肉餅既時候，順手蒸埋一條茄子，加埋一個用「辣油、麻油、陳醋、蒜蓉、砂糖」調既醬汁。

好開胃。。。。

 

加埋隔夜雞肉用薑蔥爆香返熱既雞肉一碟仔，又一餐好好味既晚餐。。。。。

 

 

整粽上癮，上一輪既粽送佐好多俾親朋戚友，所以尋日又再包多一煲，擺係雪櫃慢慢當早餐食。。。。

煮好既粽晾起佢，將水滴干，咁D粽就唔會因為剩餘既熱氣而令隻粽變得痴笠笠。。。。