屋企有「一包金針菇、幾條青椒仔、一舊烚好既五花腩、半舊洋蔥」
本來係打算用「金針菇蒜蓉豆豉煎五花腩、青椒洋蔥煙肉炒蛋」
但諗真D，金針菇會出水啵，煎五花腩唔係水水既？所以煮既時候，將材料再重新組合配搭。
金針菇將佢孤立起來，自成一國。
整一味「蒜蓉蒸金針菇」
做法：1，將金針菇洗凈之后，取一半舖響碟面，擦一湯匙蒜蓉，最好係用樽裝果隻。
2，將另一半金針菇再舖完碟面，面再擦多一湯匙蒜蓉。
3，等鑊燒滾水之后擺入去，猛火蒸三到四分鐘。
4，蒸好取出落二湯匙蒸魚豉油，一湯匙蔥沫，然后落二湯匙滾油係成碟野既面。
因為蒜蓉本身已經有一定既油，所以最后淋熟油不宜過多。
金針菇係好易熟架，所以蒸既時間唔好太耐，我蒸佐三分幾四分鐘度，事實證明個菇菇已經熟佐。。。。
本黎係想落多一層粉絲落去架，不過覺得金針菇本身已經係長條形滑滑既感覺，落粉絲係口感上會同金針菇太相似，突出唔到邊一個，反而可能會混淆佐彼此既美好感覺，所以索性凈係金針菇同蒜蓉。。。。
如果鐘意蒜蓉既香味，咁樣一味滑滑香香既蒜蓉蒸金針菇，實在不容錯過。。。。。
蒜蓉豆豉干煎五花腩。
材料：
五花腩一條，蒸熟佐之后雪一雪佢，跟住切成薄薄一片。
調味用佐半碗仔豆豉，半碗仔生蒜蓉。
配菜用佐青椒同洋蔥。
做法：
1，五花腩一定要煎得干身香脆，咁食起上黎先至唔會覺得流。
點煎咧，好簡單，就咁凈鑊擺入去，慢慢火係咁干煎，過一陣間D肥膏就會被火煎到收縮，成碟野會自己出好多好多油。
2，待五花腩煎得咁上下羅，撥過一邊，鑊中間就有好多油，就倒入蒜蓉豆豉，爆出香味，然後倒入青椒同洋蔥，開大火，跟手爆一爆。
3，依個時候，可以落豉油調味，豉油通常我都會中間既時間落，因為豉油煎一煎之后會香好多，跟住落二湯匙水，將所有味道混合係所有食材入邊。
4，熄火之前一刻，落一湯匙砂糖，撈勻，裝得碟。。。。
通常糖啊醋啊依類野我都會最后一個步驟先落，太早落熱力會將味道蒸發淡架，比較適宜最后先至落。
蒜蓉豆豉加埋豉油，凈係想像都知道會係極香既一种味道，一定要落少少糖去中和咸味，煎得干干身香噴噴既五花肉，食起上黎一D肥膩感覺都無，少少辣味既青椒同香香甜甜既洋蔥，尋晚依味餸菜，味道落得剛剛好，非常成功。。。。
（因為五花腩出佐好多油，為免浪費，上一道蒸金針菇用既熟油，就係依味餸既剩餘物資。。。依一餐飯，完全無落過買既油，全部自給自足，真係好。。。。）
湯水。
買佐包霸王花煲湯。
霸王花有清熱潤肺既功效，夏季比較適合煲依類清淡D既湯水。
一包霸王花，凈係用佐三份一，大約一兩左右。
通常如果係煲潤肺清熱既湯水，我都會配住落南北杏。
所以依味湯水，材料就係「霸王花、豬骨、紅蘿蔔、南北杏、蜜棗二粒」
係咁多材料咋。。。。
霸王花煮好之后，發大佐好多好多。。。。。
好清甜既一款湯水。
尋晚既兩餸一湯。。。。。
沒有留言:
張貼留言