我係好憎泡打粉整出黎既食物架,幾微既味道我都食得出,依家聽到新聞話食得泡打粉多會因為含鋁過高而導致老人癡呆症,更加令我有堅決既態度,唔俾老公出街食太多街外用泡打粉制既食物....
好奇怪,明明好明顯既果陣泡打粉味,強哥硬係食唔出,好似街外既雞蛋仔,格仔餅,M記既熱香餅,都係用佐大量泡打粉製成,佢都食得津津有味,咁依家就唯有儘量叫佢食少D咁羅....
強哥早上好鐘意去M記食早餐,特別係熱香餅,其實熱香餅真係非常非常非常簡單整既一樣食物,只不過我早上懶得起身整早餐俾佢,所以就由得佢去街食.
尋晚睇肥滔滔講飲講食,佢睇到一個餅仔,即刻又話好想食.
咁我見好耐無整過早餐俾佢,就決定今日早上一定早起整俾佢.
我唔鐘意泡打粉既味道,為佐令到早上既餅仔可以有發酵既效果,咁就要提早一晚先整定個粉漿.
個粉漿既調法:
我無乜比例,全恁手既感覺.
1,'低筋面粉大約100克,黑砂糖兩湯匙,雞蛋一隻,水適量"
2,另外用暖水,開佐半湯匙既酵母菌,即係"乾依士',(開酵母既水要和暖,同埋最好落多少少砂糖,因為酵母好鐘意甜味,遇甜發酵得更好)
最后將1同2再撈好.就成為佐第二早要整餅仔既基礎粉漿啦.
因為係夜晚整好個粉漿,所以我會擺入雪櫃,等佢"低溫發酵",咁就唔會因為發酵過度而變酸,而且慢慢發酵既粉漿整出黎既餅仔更加鬆化.
尋晚除佐整好粉漿,總有預先整好既一個餡.
用佐「花生碎、白砂糖、白芝麻」
花生同芝麻都係炒熟佐香口架。。。。
不過依家我已經好少自己炒花生，去街市買磅「青島花生」返黎剝佐皮去佐衣，就係好香口既花生啦，而芝麻就係吉之島買一包包炒熟佐既芝麻。。。。
第二日早上，起身，先衝好一壺咖啡，跟手開爐，將粉漿倒入平底鑊煎熟。。。。。
因為個粉漿我較得結佐少少，所以要用個鏟幫手推開塊餅仔。。。。
兩分鐘，就煎好一塊餅仔。。。。
煎好既餅仔，落花生芝麻糖。。。
然后對折
再對折。。。。
一塊好簡單又好快手既餅仔就整好啦。。。。。
時間剛剛好，老公刷完牙，去完廁所，出黎食埋個早餐。。。
面餅香脆鬆軟，花生芝麻微甜帶香，配埋一杯咖啡，一個好醒神既早餐，話咁易就搞掂。。。。
而我自己，就用返同一個面漿，煎佐兩塊Pan cake俾自己。。。。
老公睇到又食佐多一舊。。。。。
自己整Pan cake真係咁簡單，食起上黎，絕對唔會有泡打粉既味道。。。。。
香噴噴。。。。
今早用佐上次唔知買乜野送既一支「藍莓」味既練奶，真係超怪味。。。。。
好彩係送架，掉佐都唔會心痛。。。。真係好鬼怪味。。。。
食完個愛心早餐，再衝返個靚涼，強哥就全身充滿住力量去返工啦！！！
沒有留言:
張貼留言