我同奶奶既相處之道

 

的而且確，我身邊就有一對夫妻，係因為奶奶同媳婦的惡劣關係而導致夫妻分手既實例。

我覺得咁樣既結局，無一方會係蠃家。

我覺得一個和睦的家庭，必定有一個或以上既「政治高手」

政治多虛偽。有人會話，家庭當中如果都要用上非常手段去維系，咁樣既家庭生活實在太令人感覺辛苦與不堪。

辛苦？不堪？如果間唔中既小小手段與做法可以令到大多數時間既家庭生活充滿陽光與快樂，我就覺得小小既虛偽係至微不足道既付出。


嫁為人妻，首先要面對既係家庭關係上既絕大轉變，依份未知既家庭關係，會令人充滿無數想像與期待，只不過我地多數只著眼於自己眼前既不安，而忽略佐對於依種家庭關係轉變一樣會產生不安情緒既「奶奶」。

老人家對於環境既轉變，適應既過程係好需要獲得適應能力更強既年青人既體諒與支持，真正大奸大惡既人係生活當中真係極少數，因此一早打定主意「無論長輩如何對待自己，不要計較，唔理長輩係如何對待我，做為晚輩既我，只要做足我晚輩既應份，對得住自己既良心，就得啦」

對於唔使同老爺奶奶一起住，已經心存感激，因此一個月返去一二次，做多D野都無乜所謂，區區幾個鐘，儘量大家開心，自己開心。。。。。

老人家多數要面，所以每年春節，家中親朋戚友聚埋一堂之時，做為家中長媳既我，就會肚里一聲「SHOW TIME」。。。之後，開始我口甜舌滑，四肢靈活既逢場作戲。。。。

奶奶打牌我針水，老爺食煙我遞煙灰中，四姑杯茶凍佐換過杯熱既，阿叔杯茶飲曬記得幫佢添返杯。。。

一年一次認低威，個個親戚都贊奶奶得到一個好媳婦，之後成年奶奶對住我都笑笑口，乜都抵返啦。。。。


女人多數鐘意人D對自己表示關心，長者尤其如此，所以每次返去奶奶度食飯，上去之前先俾個電話「奶奶，我係樓下惠康啊，屋企有無野用曬啊，我幫你買上去啦」又或者「奶奶，我依家係樓下超市，你要唔要落黎補下倉，我係度可以幫你搬啊」，當然，記得買單時爭住俾錢，就萬無一失啦。

依地好生活化既小小行為，係可以極大咁拉近你同奶奶既關係，千期唔好將奶奶擺係自己既敵對面，就算奶奶真係做出或者講佐D令你難堪既行為同說話，咕一聲吞落肚，返到屋企再搵老公晦氣，「奶奶，你蝦我啦，睇下我點蝦返你個仔」。。。以求心理平衡。。。。。

當然，對於奶奶，唔係一味得個附和，如果奶奶真係提出佐「合理」之外既要求同做法，就必定要堅決咁表明自己既態度，要好清晰地做出拒絕，咁以後先至唔會再有類似為難既情況發生，但係，拒絕之后，一定要有另一方面自己能力上既小小補償，所謂「一啖砂糖一啖S」，係至高明既一個「政治智慧」黎架。。。。。


對於奶奶，始終佢係因為老公既關係先至成為自己既親人，係一種被動情況下既不得已，未足夠成為自己對佢既一切都「心甘情願」既理由，所以對於奶奶既態度，親密程度，要大過街外人，但係又未必需要真係好似對自己阿媽咁親密，更加唔可以好似對自己阿媽咁，肆無忌憚。。。因為言者無心，可能聽者有意，奶奶始終唔係親生阿媽，唔會真係好似對自己親生女咁，乜都無計較。

簡單黎講，對奶奶，需要維持一定既距離去表達自己對佢既尊敬。