咖喱牛腩

曾經想過，開一間細細間咖喱屋，因為咖喱食物可以預先整定，有客黎就一客米飯或薄餅，加埋一碗咖喱。

然后再搭配住售賣各款印尼串燒，整D印尼小點心，東南亞甜品，唔使好大間，細細一間仔，窗明几淨，等三五知己，夜晚係我間細細舖頭入邊，食住串燒，幾碟精美小點心，一杯凍飲，互訴心聲，而我就靜靜地，享受別人的故事與心情。。。。

而且唔駛為房租擔心，只需專心炮製美味高質素既小食，等所有人客，都能盡興而歸，為佐依個小小願望，一路好留心，有無屋企附近，好適意地，細間既舖頭出售。

繼續發下夢，開心下。。。。。

-----------------------------------------------------------

 

尋日買佐一大包牛腩，整咖喱牛腩食。

先用高速煲煲佐半個鐘，等牛腩變腍。

大大一包牛腩，煲好之后，得返一盤仔。。。。

 

配料簡單地用「薯仔兩個、洋蔥一個、甘筍一條」

 

做法：

1，自己調配既咖喱膽，先用油爆香。。。

咖喱膽既材料做法以前寫過，就唔重複啦。

 

2，然后將全部材料掉落去炒出香味。

 

3，加水燜腍薯仔，因為牛腩其實已經腍佐。

 

4，煲到薯仔腍佐之后，最后先至倒入椰漿同鹽、糖調味。

整咖喱一定唔要太早落椰漿，因為椰漿越煮會越多椰油，咁食起上黎就太過於油膩，所以等煮好咖喱之后先至倒入椰漿，咁就可以有椰香味，又唔會太油膩。。。。

有D食肆整咖喱都係用咖喱粉黎整，咁個汁就會好稀，最后會用芡汁收個咖喱汁，我硬係覺得個味會變，其實薯仔本身就有澱粉質，煮得夠時間，個汁會自己變得好結。。。。

 

 

煮好之后，蓋埋蓋焗二十分鐘先至裝碟，等牛腩更入味更腍

 

夜晚煮多一煲白飯，晚餐，搞掂。。。。

第一晚，煮佐一煲白飯配，食咖喱牛腩飯。

第二晚，煮佐煲天使面配，食咖喱牛腩面。

 

食到第三日早上既時候，預先留佐出黎既咖喱汁，煎幾塊薄餅，又變成美味既一個咖喱薄餅早餐啦。。。。