今日晚餐---黑椒蒜香金針炒肥牛、馬拉盞炒椰菜

今日真係勁啊，一日三餐即場播報。

早午餐已經POST上黎，都唔差在一個晚餐了。 。

今日下午去佐行街街，知道強哥今日約佐個客謁野，見完客唔返公司直接就返屋企，咁時間尚早，就索性等埋強哥返黎先至約係樓下超市買D餸返黎煮，屋企汽水就黎無貨，當然係等埋強哥係度先至去搬啦。。。。

買完野返到屋企，都未到六點，不過煲湯就無乜時間了，所以買既都係簡單地小炒既材料返黎煮。

黑椒醬同蒜蓉都已經售罄好耐，今日有大力士係度幫手搬野，當然係重果D全部入貨。

買佐一盒肥牛一包金針菇，就簡單地用黑椒醬及蒜蓉做調味，炒一碟好惹味既餸出黎。

 

炒法超簡單，先用滾水灼一灼個肥牛走下油，然后倒肥牛入鑊爆出香味，肥牛自己會出好多油，所以唔使落油，跟手將金針菇倒入炒一炒，落蒜蓉同黑椒醬較味，熄火之前倒入蔥段即可裝碟。。。

所以要用罐頭既蒜蓉，係因為罐頭蒜蓉經油浸過已經熟佐，同埋應該佢加佐雞粉調味，所以有時用罐頭蒜蓉炒出黎既餸，會比生蒜頭更香。。。。

黑椒同蒜蓉已有咸味，所以依味餸我無另外落鹽或者其它調味，蒜蓉同黑椒既味道加埋，係好香好香架，如果無試過，真係要試一試。。。。

金針菇既爽滑同肥牛既香味，加埋黑椒同大量既蒜蓉，真係好惹味好好送飯。。。。

依味係我自創既菜式，但係真係好好味，所以絕對歡迎抄襲~~~

 

另外用馬拉盞炒佐碟椰菜，又係好惹味架。。。

 

兩碟都係勁惹味既餸，想唔食多碗飯都好難。。。。

 

另外想講下今日特惠行情：

「惠X」買七喜或者美年達等汽水，買一Set八罐裝（一Set都係$19.90)果D，可以送一支550ml既激爽汽水(價值$5.60)，未試過依隻汽水，所以買佐Set七喜,今晚試飲下依隻汽水如果,試飲佐都OK,不過同七喜既口感就勁似.....

 

另外蠔油用完,又買一隻.原來今日又有特惠啵.

大支裝既李X記舊裝蠔油,今日都係($34.xx),再送多一支同一品牌既瑞士汁,價值($14.xx),所以今日買蠔油都好抵架...

 

依D優惠應該聽日都會繼續掛,有需要既不妨去入貨,係極好既入貨時機,不過大市近期波伏較大,專家提醒市民,不應大量持貨,入貨請謹慎!