也試包粽---靚靚綠豆粽

我係好鐘意糯米既食物架，無論何時何地，只要話係糯米整既，我都超鐘意。。。

早輪做節，粽已經食過一輪，尋日心思思，又想食，同阿媽講佐之後，約佐今日過黎我度，親手教我包粽，咁又試玩下啦。。。

買佐三斤新糯米，用佐一半，提早浸佐半個鐘水。（阿媽話唔好浸得太耐，半個鐘足夠）

去皮綠豆一斤，都係浸半個鐘。

粽葉用水煮過洗凈。。。。

 

 

關於綠豆既處理：好多人屋企都會直接將浸好既綠豆包入粽度，不過我屋企一路既傳統（我婆婆，我媽媽，依家到我）都鐘意將綠豆同栗子，落少少油，豉油，鹽，炒好味道再包。

因為綠豆如果就咁生生包粽，食起上黎，會有一層少少既豆腥味，炒一炒香佢，咁樣煮出黎既粽香好多好多。。。。

我屋企既整粽小小秘訣就係咁。。。。

 

豬肉係用五花腩，一定要用五花腩，因為肥膏蒸佐之后會全部融化入綠豆度，D綠豆會香好多，食起上黎，亦都食唔到肥既感覺，因為全部融佐。。。。

五花腩凈係用豉油醃一晚，乜都唔使落，我超級唔鐘意落五香粉醃肉，因為落佐太重既味料，完全蓋過粽本身應有既清香。。。

少少咸蛋，因為我唔鐘意食粽入邊有咸蛋，但係強哥鐘意，唯有整幾個俾佢。。。。咸蛋係自製架。。。

基本上，包粽所需材料就咁多。。。。

 

睇個蛋黃，幾靚。。。自家制架。。。。

 

阿媽唔識用水草包粽，用綿線都一樣。。。

細細個阿媽係印尼，平日無事，無粽葉買，咁就會同D姐妹用竹葉當粽葉，用沙當糯米學包粽添，幾有求學精神。。。。。

依個係包粽既線，阿媽將四條線串成一串，用S勾掛住佢，咁樣包既時候好方便就力。。。。

 

睇下，今日我包粽既架步。。。。

少少包幾個當學習，玩下。。。。

 

阿媽幫我包佐一個做示範，其它都係我自己包架啦。。。

用佐幾個凈糯米學包佐幾個之后有曬信心，越包就越順手。。。

然后學包既糯米又倒返出黎重新包肉，無幾下，就包好一串啦。。。

雖然我話包得好醜樣，不過阿媽話，算係好好啦。。。。

希望以后越包越靚啦。。。。

 

因為我個快速煲中等大細，好彩我包既粽都係細細個，一煲可以煮17個粽哩。。。。

夠晒我食啦。。。

聽日羅幾個返去奶奶度威威。。。。。

奶奶包既粽五香味太重，我都係鐘意食清清地果D。。。。

 

用快速煲真係超快，個半鐘咋，就煮好啦。。。。。

掛起黎，晾乾水先。。。。。

 

睇住滿滿既一盤粽，真係超級超級有成就感。。。。。

以後幾時想食都可以整黎食。。。。。

以後我既小朋友都可以有自家製既粽食。。。。。。

 

趁熱辣辣，快手剝一個出黎食下啦。。。。

睇下，剝光豬既粽，好靚啊。。。。。

 

切開黎睇下。。。。

個餡好足架。。。。

 

 

通常尖尖三角位都會有好厚既糯米，我包既時候專登鑽空個糯米位，塞D綠豆落去，咁包好之后，就算係邊邊三角位，都可以食到綠豆餡咧。。。。。

超豐富，超好味，超級正啊。。。。。。