蚝油小菜---菜遠炒牛肉、香菇炒甘筍

阿媽頭三十年嘅人生，係完全無食過牛肉。

係婚後先開始嘗試牛肉的滋味。

皆因婆婆拜係信佛之人，一切與牛有關的食物，全部杜絕，因此未嫁之前的母親，與牛無緣。

婚後開始嘗試烹煮牛肉，發覺牛肉之美，無可擬比，因此三不五時，屋企都會有一味牛肉嘅餸菜，而其中一款「菜遠炒牛肉」，最為常見。

好普通的住家餸菜。

買佐一細舊仔牛肉，打橫線條嚟切片，用「薑汁、豉油、生粉、酒、麻油」醃好味。

其實任何鮮嫩啲嘅菜都可統稱為菜遠嘅，我依次就用佐小白菜，一斤。

關於菜遠叫法嘅來歷，可能好多人唔係好明點解，咁同大家分享下我所知的來由：

「芛」字廣東音同「遠」字，芛在中國字典里的解釋，範指初生的花草樹木，菜芛即係指「初生的菜」咁解，因為老一輩識字者較少，加上芛字本身就比較生辟，識的人更加少，好多老一輩的人都係靠語音傳遞訊息，所以後人就錯誤地將「芛」字，誤解為同音的「遠」字，因此依家菜單中的所謂「菜遠炒XX」，其實一路係錯誤的用字，而好多人更加誤會，菜遠一定指的是菜芯一類的菜，其實，菜芛，係一切比較鮮嫩的菜蔬所指。

每個屋企應該都有自己嘅炒法，而我屋企，大致做法就係：

1、落少少油，將牛肉炒散至略熟，然後另裝碟備用。

2、原鑊落少少油，爆香蒜蓉，倒入白菜炒至軟身。

3、將牛肉倒返入鑊，與菜炒勻。

4、準備好一個芡汁「蚝油二匙、糖半匙、酒少少、生粉一細匙、清水」

5、起鑊之前，將芡汁倒入兜炒至均即可。

因為芡汁同牛肉已有足夠味道，所以我無額外再俾鹽，如果食得味重者，可以適當炒菜的時候，俾少少鹽入去調味。

自細就好鐘意用依味菜嘅汁撈飯，所以煮耐啲等菜出哂汁，牛肉菜汁撈飯，好正~~~

我好鐘意食甘筍，閒來無事，甘筍切成幾條幼幼長條擺係雪櫃，得閒就咬下，滿嘴的清甜與香，好開心㗎~~

無意中發覺「甘筍、香菇、蚝油」三樣材料加埋一起炒，味道非常地好，所以時不時都會咁樣配搭炒碟餸。

尋日就將一大條甘筍切絲，幾朵香菇浸腍之後切條，幾粒墨魚丸切絲，配埋蚝油，炒做一碟餸。

炒法：

1、先落油將香菇炒出香味，然後倒入墨魚丸同炒，撥至一邊。

2、再落少少油，將甘筍大火炒二分鐘左右

3、全部材料撈埋炒勻，落蚝油二匙調味，炒均味道即可裝碟`~

成碟餸我都可以食哂啊~~~

鐘意食甘筍的人，不妨一試~~

而且甘筍富含豐富的維它命A，對於滋養眼細胞有極之正面的作用，現代人成日對住電腦電視，其實好應該多啲食依類食物~~~