香辣香菇燜排骨

禮拜日已經提早去拜山。唔洗正日同人逼。

只簡單地，到佐華人墳場後，買幾扎鮮花，然後逐個去先人墳頭前，大家圍埋一起，由長輩帶頭祈禱，最後向先人鞠三個躬，完成~~

之後座車去酒樓食餐飯，搞掂~~

輕輕鬆鬆，無任何繁複儀式，已向先人傳達到後人的敬意。

理性而環保。

 

其中有個插曲：老爺每年都要去附近的一棵樹下睇一個「鳥巢」。

每年同一棵樹上都會築有一個當年新的鳥巢，根據先人傳落的經驗，每年清明之際，所見鳥巢的位置，可以清楚預測到今年風季的大致情況。

鳥巢築得越高，今年打風的機會越少，風力越弱，反之，鳥巢築得越低，說明今年打風的次數會越多，風球就越大，老爺祖輩起就係靠海食飯之人，所以對於每年的風季總是特別敏感，依個睇鳥巢估風球的經驗，歷時數百年，準確係數極高。

而最令人覺得不安的，係今年棵樹上，竟然全無鳥巢的蹤影。

老爺睇佐幾十的鳥巢，今年竟然無影？

動物本身具有一定的遺傳基因，對於大自然有一種好本能好神秘的預測能力，同一款鳥，每年都會返到同一個地點築巢係好合乎基因理論，但今年，竟然無返到原處築巢。

對此，老爺的解釋係：「一係今年唔會打風，一就係-----

今年，會有超級勁大勁多颱風」。。。。。。

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

又整腸仔包食，貪佢夠簡單，又好味。

不過次次啲皮都唔得夠光滑~~~

卷得唔靚，不過勝在好味，算啦，唯有接受~~

整佐一煲香菇燜排骨。做法來自香菇燜雞，只不過將雞轉成排骨。

同埋配料上做出少少調整。

譬如，我會先用花椒爆香個油，等油有佐花椒味。

然後再倒入蔥頭、薑蒜炒出香味。

然後倒入排骨翻炒至轉白色。

我落埋少少乾辣椒絲，少少辣辣哋，惹味哋~~

我用豬軟骨（帶白色軟骨的排骨），肉比較容易腍。

在Taste可以買到一盒盒的豬軟骨的部位。

然後倒入浸腍佐嘅香菇，倒入麵豉醬，白酒、糖、想色水靚啲，又落埋少少老抽。

無落鹽，因為麵豉本身有咸味。

燜至收汁，略為翻炒上色均勻即可`~

麵豉煮排骨本身已經好香好香，加埋香菇，總要惹味~~

得閒試下，好好味㗎~~

然後炒多碟韭菜炒蛋，搞掂~~~