生煎洋蔥餅

某日出街飲茶，唔知係食得太早定係餐量過少，返到嚟下晝三點幾，突然地覺得肚仔隱約地有些餓意，咁我又突然地好想好想食生煎包一類的嘢。

即刻走去拎麵粉落嚟，搓麵整包~~

話咁易，半個鐘唔洗即刻有得食~~~

四個大煎包~~~

整中式包點對於我嚟講真係好簡單的一件事，我覺得比起落街買總要快手，只要屋企有一包麵粉，總能變出若干小食~~

要少少幾湯匙麵粉，加少少酵母少少水，搓好個麵團，等佢醒幾分鐘嘅時候，去搞餡---三分鐘嘅事。

雪櫃有啲蒸肉餅凈返嘅免治豬肉，咁就加埋洋蔥，加埋豉油糖花椒粉麻油胡椒粉咁攪好個肉餡---二分鐘嘅事。

餡搞好啦，麵團都唔洗理佢係咪發佐酵，直接好似整包咁，搓好一塊塊麵皮，將肉餡包好。

包到好似一個包咁嘅款。

然後再將佢壓扁~~~

如是整好四個生嘅麵坯，都係五分鐘左右嘅事。

然後係煎Pan里落少少油，將未發酵的麵坯擺入去，然後成個煎Pan就擺係略略溫暖的爐頭之上發酵大約三個字，見佢略略脹大，咁就可以開始煎啦。

先開中火煎至麵坯兩邊金黃，然後落少少水，開細火焗多三五分鐘。

最後開大火收干水，等餡餅兩邊煎至香脆即可~~

全程都係半個鐘左右咋~~~

香噴噴，軟綿綿的餅皮，加埋又多汁又嫩滑的肉餡，強哥返到嚟我整返熱俾佢食，咬一啖，即刻「唔」.....太好味~~~

「老婆，果間XX清真牛肉餅，同你款洋蔥餅，真係無得揮」~~~

「依啲，先係㗎嘛」~~~~

因為早幾日剛去食過「果間」牛肉餅，果間牛肉餅用嘅係「燙麵」餅皮，其實同我整嘅係兩個種類嘢嚟嘅，強哥個人就比較鐘意食依類發起嘅餅皮，較為鬆軟，所以當然好俾面地覺得老婆整得好味好多~~~

有感情分在內，作不得準嘅~~~