洋蔥肉丁煎餅仔之電飯煲版「食譜」

「生平不羨人居大屋或是著華服，此一生，居不過一室，臥不過半床，著不過一衫，食不過一碗」

無意翻睇到自己多年前寫的其中一段字，樂見自己也確如所言，從不在無謂的物質生活上做過多的追求與比較，只隨興地過自己的生活，極快樂。

眼見好多人將「識飲、識食、識名牌」等同於識得嘆世界。

只可以話，依部份人的眼界，實在細得好可憐。

當一個人的世界只得區區一個城咁大的時候，眼界心胸所限，所謂的識飲識食，確係人生最大的目標。

當一個人所有的生存目的不過係為佐滿足一眾物質生活的時候，依種方式，不配稱為生活，只可以話，係一種生存，一種漫無目的不知所以然的生存，以「樓、車、事業、子女、名聲」為名義的存在。

有無試過，無任何壓力，無任何所求，無任何比較，坦坦然地享受存在的每一刻？

感受清晨一抹拂過臉頰的微風，感覺赤裸雙腳踩踏砂礫的刺痛，感動鄰家幼童的牙牙學語，去傾聽，去感覺，去享受生活中一切無需量化而眾生平等享有的資源，咁，先叫做「在生活」。

~~~~~~~~~~~~~~~~~~~~~~~~~~~~~~~~~~~~~~~

做人做事做食物，都隨興之致，所以見雪櫃有半個洋蔥，少少免治豬肉，咁就將免治豬肉先用「豉油糖胡椒粉」炒香炒散，加埋洋蔥粒同炒出香味，整好個餡，再諗過整啲咩好。

咁就用佐少少麵粉，加埋酵母菌同糖（同埋少少蘇打粉），搓好個麵團。

點知麵粉俾多佐，個麵團稍大，咁就一於將佢搓成大大一塊，擦少少花椒油，然後再將洋蔥肉丁餡均勻地舖係麵皮上。

無需發酵，直接將搓好的麵團舖好餡，然後卷起盤好。

因為當時用佐擺係手邊嘅電飯煲膽去搓麵粉，所以索性將整好型的麵團直接就咁擺入個電飯煲入邊，先係室溫下發酵半個鐘左右，然後包好保鮮膜，成個煲擺入雪櫃，低溫下發酵一晚。

第二日早上，提早將電飯煲從雪櫃取出，擺係室溫下十分鐘左右。

諗住電飯煲膽都係咁直接加熱煮飯㗎啦，咁我就試下用電飯煲，用慢火係電陶爐上加熱烹煮個洋蔥肉丁餅啦。

就咁將電飯煲，擺係電陶爐之上，沿餅邊淋少少油落去，然後開200度火，慢火之下，求其搵個蓋冚住個煲，就咁細火煮15分鐘。

（因為個餅較厚身，所以煮嘅時間稍長先可以保證熟透至內心，如果唔用電陶爐，其實可以索性直接用電飯煲，開電制，就咁當煮飯咁去煎個餅，不過記得要淋少少油~~）

睇下，15分鐘之後，我將個餅翻個身，煎到金黃色㗎啦。。。。

然後開400火，繼續煎多5分鐘，搞掂個餅餅兩面金黃香脆，食得啦~~~

哈哈，煎得好靚好香㗎個餅餅~~~

整之前全無概念，總之見步行步就係啦。。。

不過我都好相信以自己過往的煮食積累落的經驗，隨興之中，其實有加埋合理的推測，咁就整到一個意料之外，情理之中的「洋蔥肉丁煎餅仔之電飯煲版」~~~

用餘溫，煮埋個麥皮~~

一個醒神二人早餐~~~

發得真係好靚㗎，煎至外脆內軟，加埋豐富的餡料，香噴噴~~