焗豬扒飯

用黑醋麻油糖，拌好一碟仔青瓜。。。

酸酸甜甜，又爽又清香，好味~~

強哥近排成日要落地盤，搞到鼻腔污漕，又乾又燥，所以要食多啲紅蘿蔔，紅蘿蔔除佐對眼好人人都知，其實佢對於恢復眼同鼻的粘膜都有上佳效果，所以，炒多碟紅蘿蔔炒蛋~~~

多食甘筍有益㗎。。。。

想食焗豬扒飯。

以前初初學整，一整要大半日時間。依家煮餸已變熟手技工，原來整焗豬扒飯，真係話咁快~~

飯提早煲好，強哥話收工返緊嚟，即刻倒飯入鑊加蛋炒好個飯底，三五分鐘嘅事。

豬扒提早用「生粉、水、酒、豉油、糖、胡椒粉」醃好入味。

炒好飯後，煎豬扒，兩面煎熟即可。

又係三五分鐘嘅事。

豬扒不宜久煮，會煮老。

煎好的豬扒，擺上飯面，用剪刀剪成條狀。

一分鐘左右嘅事。

煎好豬扒，原鑊煮茄醬。

蒜蓉爆一爆香個鑊，將切好嘅蕃茄倒入炒炒，然後落少少水，倒入喼汁、茄汁較好味。

又係三五分鐘嘅事。

將煮好的茄汁淋上豬扒面，再舖多幾塊車打芝士。

冚蓋中火焗二三分鐘至芝士融化。。。。

趁熱撈一撈勻芝士。。。

強哥返到嚟，剛剛好焗緊芝士，依個時候，開始炒個甘筍，又係幾分鐘嘅事，等佢漱洗換好衫，開得飯啦~~~

熱辣辣焗豬扒飯，即整即食，

好味到咧。。。。