韓式辣炒年糕

假期玩佐幾日返嚟，個人散哂。

我孤身一人外出游玩尚且如此，真是無法想像，它日帶同小朋友外游，真不知係散緊心定係罰緊自己。所以要玩，絕對要趁依家還身無負累之時。

無乜胃口食正餐，所以都係煮啲小食咁嚟食較為易入口。

煮一個韓式炒年糕，完全無油煙，簡單快靚正，因為強哥唔多鐘意依啲味道，所以通常都係自己一個享用。

先睇下煮好的年糕，外形就在一定同街食嘅一樣，而味道，當然一樣咁樣又香又滑啦~~~

同上海炒年糕係完全兩回事，韓國炒年糕，其實唔應該叫炒，應該叫「煮」。

配料亦都係悉隨尊便，咁我就用佐雪櫃嘅多餘物資。

「黃芽白、甘筍、青椒、洋蔥、蔥段、韓國年糕、韓國甜辣醬」

依一大碟，係我一人份㗎啦，煮起大大一份~~

韓國年糕真係煮熟嘅，完全同炒唔關事，睇下做法你就知。

1、落水浸過年糕，落一大匙韓國甜辣醬（已配好甜辣味），一細匙韓國大醬增加香味，一細匙糖，因為韓國年糕係要辣辣咸咸甜甜啲咁先好味，如果用的辣醬本身無乜味，就要適當加多少少砂糖。

2、煮幾分鐘，等汁開始濃稠，落除佐蔥段以外的其它所有材料落去煮熟。

3、最後所有材料煮熟之後，熄火，落蔥段，撈一撈，搞掂`~

水要落多少少㗎，因為年糕係用糯米等物制成，水煮之後會令湯汁變得濃稠，如果水少就好快會干水，無汁就唔好食啦~~

基本上煮韓式年糕，同煮公仔麵的過程一樣，全部落水煮熟而已，非常簡單~~

愛極了年糕果種煙韌之極的口感，一啖年糕配埋甜甜辣辣的醬汁，唔知唔覺之間，真係食唔少落肚㗎~~~

睇下，另一日，又煮年糕，超市一包韓國年糕好大份，我要食好幾次先食得哂。

所以早餐午餐，自己一個人食嘅時候就整返一碗仔，又方便又好味~~~

落乜材料真係同煮公仔麵一樣，鐘意落乜都得。。。。

我總會落埋啲芝士入去，有佐芝士味，真係香噴噴㗎~~

最後凈返少少年糕的時候，落稍多一些的水，咁樣煮軟佐年糕之後，落埋一包韓國煮麵入去，再打埋個蛋，最後舖多塊車打芝士，熱辣辣香噴噴的年糕煮麵，又搞掂，不過自己一個人食唔哂，依一大碗麵，係同強哥的豐富早餐~~~