開胃小食---牛肉凍「食譜」

先睇下成品~~~

係咪睇到，都覺得冰爽咧~~

又點止睇得啊，食落，總好好味添㗎`~

好耐無整過心機餸，尋日見天朗氣清，心情大好，咁就整返款想整好耐嘅小食。

做法：

1、牛腱一條，先用滾水碌一碌生牛腱，等佢略略收縮表面，然後過清水洗乾淨。

2、另燒滾一煲水，將牛腱掉入去煮熟至定型，然後將表面的浮泡片走，煮牛肉的水要留起。

3、準備香料「薑片、蒜、香葉、八角、花椒」

     將香料裝入隔渣袋。

4、將香料包投入牛腱水入邊，落少少酒增加香味，開細火慢火煲一個小時至牛肉酥軟

5、然後將牛肉撈起，香料包棄置，將牛肉切成細細舊，牛肉湯依然要保留好

6、將牛肉，擺入一個耐熱容器。

7、準備一湯匙魚膠粉，用凍水開好。

8、煮牛腱的湯水重新煲返滾，將凍水開好的魚膠粉倒入湯水度，同一方向攪勻

9、將溝佐魚膠粉的牛肉湯，趁熱，倒入牛肉粒入邊，攤凍之後，擺入雪櫃。

      擺入雪櫃冷藏果層就得啦，無需擺入冷凍果度。

    （我總落佐少少甘筍粒，增加口感同色澤）

10、雪佐一晚的牛肉及湯，已經凝固成功，牛肉凍，成形~~

11、煮牛肉過程中係無落過調味的。所以要另外準備一個味水。

        想佢開胃啲，所以調佐一個黑醋汁。

      「蒜蓉、蔥粒、黑醋、砂糖、麻油、花椒油、七味粉」

        攪均即成。

12、將凝固好的牛肉凍切成片或者塊狀，將味水倒入，即成~~

加佐香料煮好的牛肉，本身已有五香味，再加埋香香酸酸的味水，凍冰冰的口感，如果盛夏食嚟，依款小食，真正一流~~~